आइसिसी विश्वकप क्रिकेट अन्तर्गत शनिबार साँझ सम्पन्न खेलमा दक्षिण अफ्रिकाका तीन खेलाडीले बनाएको शतकको मद्दतले श्रीलंकालाई १०२ रनको विशाल अन्तरले पराजित गरेको छ ।
दक्षिण अफ्रिकाले प्रस्तुत गरेको ४२९ रनको विशाल लक्ष पछ्याउने क्रममा श्रीलंकाले जबर्जस्त ब्याटिङ गरी ३२६ रन बनाएको थियो, तर यो जितका लागि पर्याप्त भएन । श्रीलंकाको टोली ४४.५ ओभरमा अलआउट भएको थियो ।
यसअघि टस जितेर श्रीलंकाले दक्षिण अफ्रिकालाई ब्याटिङको निम्तो दिएको थियो । तर यो निर्णय श्रीलंकाका लागि घातक साबित भयो । दक्षिण अफ्रिकाका तीन खेलाडीले शतक प्रहार गरेका थिए ।
अफ्रिकी खेलाडीहरु क्विन्टन डी ककले १००, भान डर डूसेनले १०८ तथा एडेन मार्करामले आक्रामक रुपमा १०६ रन बनाएका थिए ।
विशाल लक्ष पछ्याएको श्रीलंकालाई सुरुमै झड्का लागेको थियो । प्रारम्भिक ब्याट्सम्यान पाथुम निसान्का शून्यमै आउट भएका थिए । लगत्तै कुसल परेरा पनि ७ रनमै पवेलियन फर्केका थिए ।
तर त्यसपछि क्रिजमा कुसल मेन्डिसले केही आतसबाजी खेल प्रस्तुत गरेका थिए । उनले ४२ बलमा ७६ रन बनाए, र उनी रबाडाको बलमा आउट भए । साथै, सदीरा समरविक्रमाले २३, चरिथ असलन्काले ७९, धनन्जय सिल्भाले ११, डसुन सनाकाले ६८, कसुन रजिथाले ३३ रन बनाए ।
दक्षिण अफ्रिकी बलरहरु गेराल्ड कोजीले ३, केशव महाराज, कागिसो रबाडा र मार्को यान्सेनले समान दुई दुई तथा लुंगी एन्गिडीले १ विकेट लिएका थिए ।
यो जितसँगै दक्षिण अफ्रिकाले २ अंक बटुलेको थियो ।
भोलि आइतबार भारत र अस्ट्रेलियाबीच चेन्नाईमा खेल हुनेछ ।
