एजेन्सी । आईसीसी विश्वकप २०२३ सुरु हुनुअघि अफगानिस्तान क्रिकेट टोलीले ठूलो चाल चालेको छ । अफगानिस्तानले विश्वकपका लागि पूर्व भारतीय खेलाडी अजय जडेजालाई मेन्टरको रुपमा टोलीमा समावेश गरेको छ ।
अफगानिस्तान क्रिकेट बोर्डले यो जानकारी दिएको हो । जडेजासँग धेरै अनुभव छ र उनी भारतको अवस्थाबारे राम्ररी जानकार छन् ।
अजय जडेजालाई मेन्टरका रूपमा टोलीमा राख्दा अफगानिस्तान क्रिकेट टोलीलाई ठूलो फाइदा हुन सक्छ । अजय जडेजालाई भारतका उत्कृष्ट ब्याट्सम्यानमा गनिन्छ । यसका साथै उनलाई यो खेलको पनि राम्रो बुझाइ छ । खेलाडीका रूपमा अजय जडेजाले भारतका लागि तीनवटा विश्वकप पनि खेलेका थिए ।
उनी सन् १९९२, १९९६ र १९९९ को विश्वकपमा भारतीय टोलीका सदस्य थिए । अजय जडेजाले भारतका लागि कुल १९६ अन्तर्राष्ट्रिय खेल खेलेका छन् । यस अवधिमा उनको ब्याटबाट ३७.४७ को औसतमा ५ हजार ३५९ रन आएको थियो । जडेजाले आफ्नो करियरमा ६ शतक र ३० अर्धशतक बनाएका थिए ।
