काठमाडौँ । राजधानीमा जारी दक्षिण एसियाली फुटबल महासङ्घ यू–१९ साफ च्याम्पियनशिपको सेमिफाइनलमा आज घरेलु टोली नेपालले भारतको सामना गर्दैछ ।
नेपाल र भारतबीचको खेल त्रिपुरेश्वरस्थित दशरथ रंगशालामा साँझ ५ः३० बजे सुरु हुनेछ । घरेलु दर्शकको भरपुर साथ रहने नेपाल भारतलाई हराउँदै फाइनलमा स्थान बनाउन चाहन्छ । यद्यपि, बलियो टोली भारतविरुद्ध खेल्न नेपाललाई सहज भने हुने छैन ।
नेपालले समूह चरणको अन्तिम खेलमा माल्दिभ्सलाई ४–१ गोलले पराजित गर्दै समूह उपविजेता बनेर सेमिफाइनलमा स्थान बनाएको हो । भारत भने समूह बी को विजेता बन्दै सेमिफाइनलमा स्थान बनाएको हो ।
यस्तै, आज दिउँसो पाकिस्तान र भुटानले पनि फाइनलमा स्थान बनाउन सेमिफाइनल खेल्दैछन् । यी दुई टोलीबीचको खेल दिउँसो १ः३० बजे दशरथ रंगशालामा नै हुनेछ । ६ टोलीलाई दुई समूहमा विभाजन गरिएको यस च्याम्पियनसिपमा माल्दिभ्स र बंगलादेश समूह चरणबाटै बाहिरिएका छन् ।
२०१५ देखि सुरु भएको प्रतियोगितामा नेपाल र भारतले समान दुई–दुई पटक उपाधि जितेका छन् ।
फाइनल खेल शनिबार साँझ ५ः३० बजे हुनेछ ।
