काठमाडौँ । आईतबार पनि राहत शिक्षक र पेन्सन वञ्चित शिक्षकले राजधानीमा आन्दोलन जारी राखेका छन् । शुक्रबार सरकार र शिक्षक महासंघबीच सम्झौता भएपनि उनिहरुले प्रदर्शन जारी राखेका हुन् ।
यसअघि नेपाल राहत शिक्षक केन्द्रीय समिति र पेन्सन वञ्चित शिक्षक केन्द्रीय समितिले छुट्टाछुट्टै विज्ञप्ति जारी गर्दै आन्दोलन जारी राख्ने बताएका थिए । विज्ञप्तिमा असोज ५ गते भएको सम्झौताले आम शिक्षक कर्मचारीको मानमर्दन भएको र सो सम्झौताको विरुद्ध भण्डाफोर गर्दै सम्पूर्ण राहत शिक्षकले आफ्नो स्थायी व्यवस्थापनका लागि आन्दोलन जारी राख्ने बताएको थियो ।
त्यस्तै, पेन्सन वञ्चित शिक्षक केन्द्रीय संघर्ष समितिले पनि सम्पूर्ण शिक्षक कर्मचारीको माग र मुद्दालाई सरकारले सम्बोधन नगरेसम्म आन्दोलन जारी राख्ने निर्णय गरेको थियो । उनीहरुले शनिबार पनि माइतीघरदेखि नयाँ बानेश्वरसम्म विरोध प्रदर्शन गरेका थिए ।
