कास्की । गण्डकी प्रदेशसभाको बैठक जारी रहँदा दुई सांसद भने अनुपस्थित रहेका छन् ।
कांग्रेस-माओवादी सहितका दलले पेस गरेको अविश्वास प्रस्तावमा अन्तिम छलफल र मतदानका दिन स्वतन्त्र सांसद दिपक मनाङे र जनमोर्चाका सांसद खिमविक्रम शाही अनुपस्थित हुनुभएको हो । उहाँहरुको फोन पनि स्वीचअफ रहेको बताइएको छ ।
मतदानका बेलासम्म उहाँहरु उपस्थित नभए पृथ्वीसुब्बा गुरुङको सरकार जोगिने देखिन्छ ।
अविश्वास प्रस्ताव पारित हुन ६० सदस्यीय प्रदेशसभामा ३१ मत चाहिन्छ । जसमध्ये कांग्रेसको १५ र माओवादीको ११ सांसदसहित २६ जना छन् । जसपाका २ जना छन् ।
जनमोर्चाका दुवै सांसदले अविश्वासको पक्षमा मतदान गरेपनि अविश्वास प्रस्ताव पारित हुने सम्भावना कम छ । जसका लागि एमालेका एकजना माधव नेपाल पक्षधर सांसद इन्द्रलाल सापकोटाले फ्लोर क्रस गरेमा सरकार संकटमा पर्नेछ ।
