काठमाडौँ । नेपाली कांग्रेसका नेता डा शेखर कोइरालाले शिक्षकहरुले राखेका मागहरु तुरुन्त सम्बोधन गर्न सरकारसमक्ष आग्रह गर्नुभएको छ ।
सामाजिक सञ्जालमार्फत उहाँले भन्नुभएको छ, “शिक्षकहरुका मागहरु केही व्यावहारिक, कानूनी र संवैधानिक छन् । दक्ष जनशक्ति उत्पादनमा तल्लो कक्षाबाटै राम्रो शिक्षा दिनुपर्छ । व्यावहारिक कारणले त्यसो हुन सकेको देखिन्न । यस्ता मागहरु तुरुन्त सम्बोधन गरौँ।”
उहाँले कानूनीरुपमा शिक्षा क्षेत्र सबल गराउन शिक्षकहरुको भूमिकाको उच्च मूल्यांकन गर्दै विधेयकमा आवश्यक प्रावधान समेट्न र आन्दोलन आजै सहमतिमा टुंग्याउन अनुरोध गर्नुभएको छ। “संघीय लोकतान्त्रिक गणतन्त्र स्थापनाका लागि अग्रमोर्चामा रहनुभएका शिक्षकहरु आज विद्यालय बन्द गरेर आफ्नो अधिकारका लागि सडकमा आउन बाध्य हुनु दुर्भाग्य हो”, उहाँले भन्नुभएको छ, “यस्ता संवेदनशील विषयमा सरकार जिम्मेवार बनोस् र तुरुन्त समस्या समाधान गरोस् ।”
