काठमाडौं । नेकपा एमालेका अध्यक्ष केपी शर्मा ओलीले राजनितिमा अझै २० वर्ष सक्रिय रहने बताएका छन् ।
शनिबार ‘बा सँग बालबालिका’ कार्यक्रममा किशोर किशोरीहरुका प्रश्नको जवाफ दिँदै ओलीले अझै २० वर्ष सक्रिय रहने तर योग्यतम व्यक्तिलाई कार्यभार सुम्पिएर देश चलाउन सघाउने बताएका हुन् ।
तपाईको अनुपस्थितिमा कसले नेतृत्व गरोस् भन्ने प्रश्नमा ओलीले आफू सक्रिय रहदै गर्दा योग्य व्यक्तिलाई पार्टीको नेतृत्व सुम्पिएर देश चलाउन जिम्मा दिने घोषणा गरेका हुन् । ‘मेरो अनुपस्थिति अझै २० वर्ष हुँदैन । म पहिले अलि बिरामी थिएँ अहिले ठिक छु । दोस्रोपटक प्रत्यारोपण गरेको किड्नीले राम्रोसँग काम गरिरहेको छ ।’, ओलीले भने, म २० वर्ष सक्रिय रहन्छु भन्नुको मतलब म नेतृत्व ओगटेर बस्छु भन्ने होइन । आफू सक्रिय रहेकै बेला योग्य व्यक्तिलाई कार्यभार सुम्पिएर देश चलाउन सहयोग गर्छु ।’
आफ्नो पिता अहिले पनि दिनमा दुई तीन किलोमिटर बिना लौरो हिड्ने गरेको बताउदै ओलीले २० वर्षसम्म आफू पनि सक्रिय रहने बताए ।
