काठमाडौँ । नेपाल मलेसियामा जारी आइसिसी महिला टि–२० विश्वकप एसिया क्षेत्र छनोटबाट बाहिरिएको छ । शुक्रबार भएको सेमिफाइनल खेलमा थाईल्यान्डसँग ४६ रनले पराजित हुँदै नेपाल बाहिरिएको हो । यससँगै नेपालको २०२४ मा हुने ग्लोबल टि–२० छनोट हुँदै विश्वकप खेल्ने सपना समाप्त भएको छ ।
जितको लागि १ सय ६ रनको विजयी लक्ष्य पछ्याएको नेपाल १९.३ ओभरमा ५९ रन बनाउदै अल आउट भयो । नेपालको लागि कविता कुँवरले सर्वाधिक १७ रन बनाईन् । कविता जोशी र अप्सरी बेगमले समान १० रन बनाउँदा अन्य कुनैपनि नेपाली ब्याटरले दोहोरो अंकमा रन बनाउन सकेनन्।
थाईल्यान्डकी ओनिचा कम्चोम्फु र थिपाच्चा पुथावोङले समान ३ विकेट लिए। नाट्या बुचथमले २ विकेट लिइन् ।
त्यसअघि मलेसियाको बांगीमा टस हारेर ब्याटिङ गरेको थाईल्यान्डले निर्धारित २० ओभरमा २ विकेट गुमाउँदै १ सय ५ रन बनाएको थियो ।
थाईल्यान्डको जितमा नानपाट खोन्चारोएनकाइले सर्वाधिक ५९ रनको योगदान दिएकी थिइन् । यस्तै, नथाकन चान्थामले ३१ रन बनाईन् । खोन्चारोएनकाइ र चान्थामले दोस्रो विकेटका लागि ६८ रनको साझेदारी गरेका थिए । ओपनर सुवानान खिआटो २ रन बनाएर आउट हुँदा चानिदा ११ रनमा नट आउट रहिन् ।
नेपालकी पुजा महतो र कविता कुँवरले समान १ विकेट लिए ।
