एजेन्सी । पहिलो एकदिवसीय खेलमा अष्ट्रेलियाले दक्षिण अफ्रिकालाई ३ विकेटले पराजित गरेको छ । ब्लोमफन्टेनस्थित मङ्गोङ ओभल मैदानमा पहिले ब्याटिङ गरेको दक्षिण अफ्रिकाले २२२ रन बनाएको थियो । जवाफमा अस्ट्रेलियाले ४०.२ ओभरमा ७ विकेट गुमाएर लक्ष्य पुरा गर्यो ।
कन्कसन विकल्पका खेलाडी मार्नस लाबुशेनले ८० रन बनाए । उनले आठौं विकेटका लागि एस्टन अगरसँग ११२ रनको साझेदारी गर्दै टोलीलाई सजिलै जित दिलाए । दक्षिण अफ्रिकाका लागि कप्तान टेम्बा बाभुमाले अविजित ११४ रन बनाए ।
यो जितसँगै अस्ट्रेलियाले ५ खेलको एकदिवसीय सिरिजमा १–० को अग्रता बनाएको छ । सिरिजको दोस्रो एकदिवसीय खेल यही मैदानमा सेप्टेम्बर ९ मा हुनेछ ।
टस हारेर पहिले ब्याटिङ गरेको दक्षिण अफ्रिकाले सुस्त सुरुवात गरेको थियो । टोलीले ९औं ओभरमा क्विन्टन डी ककको विकेट गुमाएको थियो । उनीपछि रासी भान डेर डुसेन पनि ८ रन बनाएर रनआउट भए । कप्तान टेम्बा बाभुमाले एक छेउमा पकड राखे पनि अर्को छेउमा विकेटहरू लगातार गिरिरहेका थिए । एडन मार्कराम १९ र हेनरिक क्लासेनले मात्र १४ रन बनाउन सके । डेभिड मिलरले खाता पनि खोल्न सकेनन् ।
१०० रनको स्कोरमा द्रुत ५ विकेट गुमाएपछि मार्को जान्सेन र बाभुमाले अर्धशतकीय साझेदारी गरे । जान्सेन ३२ रन बनाएर आउट भए र दुईबीचको साझेदारी टुट्यो ।
अष्ट्रेलियाका तेज बलर जोस हेजलउडले सर्वाधिक ३ विकेट लिए । मार्कस स्टोइनिसले २ विकेट लिए भने सिन एबोट, एस्टन अगर, एडम जाम्पा र क्यामरुन ग्रीनले १/१ विकेट लिए । एक ब्याटर रनआउट भए ।
२२३ रनको लक्ष्य पछ्याएको अष्ट्रेलियाको टोलीको पनि सुरुवात खराब रह्यो । टोलीले दोस्रो बलमा डेभिड वार्नरको विकेट गुमाएको थियो । कप्तान मिचेल मार्स १७, जोस इंग्लिस १ र एलेक्स क्यारी पनि ३ रन मात्रै बनाएर आउट भए । मार्कस स्टोइनिसले इनिङ्स सम्हाल्ने प्रयास गरे तर उनी पनि १७ रन बनाएर आउट भए । ट्राभिस हेडले ३३ रन बनाए ।
विश्वकप टोलीमा परेका सिन एबोटले केही बल खेले पनि ९ रन बनाएर आउट भए । उनको विकेटपछि अष्ट्रेलियाको स्कोर ७ विकेटमा ११३ रन बन्यो ।
४ नम्बरमा ब्याटिङ गर्न आएका क्यामरुन ग्रीनलाई दोस्रो बलमा कागिसो रबाडाले बाउन्सर बल दिए । बल उनको हेल्मेटमा सिधै ठोकियो, फिजियोले जाँच गरेपछि उनी चोटग्रस्त भएर मैदानबाट बाहिर निस्किए । उनको स्थानमा, टोलीले मार्नस लाबुसेनलाई कन्कशन सब्स्टिट्यूटको रूपमा समावेश गरियो ।
लाबुसेन आफ्नो एकदिवसीय करियरमा पहिलो पटक ८ नम्बरमा ब्याटिङ गर्न आएका थिए । उनले द्रुत रन बनाए र ४६ बलमा आफ्नो अर्धशतक पूरा गरे । लाबुसेनले अष्ट्रेलियालाई कठिन परिस्थितिबाट जोगाए । उनले एस्टन अगरसँग ११२ रनको साझेदारी गर्दै टोलीलाई ७ विकेटले जिताए । लाबुसेन ८० र अगर ४८ रन बनाएर नटआउट रहे ।
दक्षिण अफ्रिकाका कागिसो रबाडा र जेराल्ड कोएट्जीले २–२ विकेट लिए । उनका अलावा मार्को यानेस, लुंगी एनगिडी र केशव महाराजले १–१ विकेट लिए ।
