काठमाडौँ । लामो समयको अन्तरालपछि अभिनेता पल शाहले फिल्ममा कमब्याक गर्ने भएका छन् । फिल्म ‘मायावी’मा उनी अनुबन्धित भएका हुन् । फिल्ममा दिवाकर भट्टराईको निर्देशन रहेको छ ।
डेढ वर्षपछि कमब्याकको तयारी गरिरहेका पलले अन्ततः दिवाकरको फिल्ममार्फत कमब्याक गर्ने भएका हुन् । निर्देशक दिवाकरले श्रीकृष्ण जन्माष्टमीको अवसर पारेर बुधबार ‘मायावी’को घोषणा गरेका थिए ।
फिल्ममा भट्टराई स्वयंको कथा रहनेछ । फिल्ममा यसअघि नै अभिनेत्री दीपिका प्रसाईं नायिकाका रुपमा पक्का भइसकेकी छन् । फिल्म ‘ऐश्वर्या’ पछि दिवाकर र दीपिकाको यो दोस्रो सहकार्य हो ।
यद्यपि, फिल्मका अन्य कलाकार र प्राविधिक सार्वजनिक गरिंदै जाने निर्देशक भट्टराई बताउँछन् । फिल्म असोज २ गतेबाट छायांकनमा जाने जनाइएको छ ।
दिवाकरले फिल्म ‘मेरो जीवन साथी’, ‘स्टुपिड मन’, ‘ड्रिम्स’, ‘ऐश्वर्य’ र ‘क्याप्टेन’ जस्ता फिल्म निर्देशन गरिसकेका छन् ।
