एजेन्सी । एसिया कप अन्तर्गत भारत र पाकिस्तानबीचको समूह लिग खेल वर्षाका कारण रद्द भयो । साथै, नेपाल र भारतबीचको खेलमा पनि भारतीय इनिङ्समा ओभर घटाइएको थियो ।
यसैबीच, पाकिस्तान क्रिकेट बोर्ड (पीसीबी)ले एसियाली क्रिकेट काउन्सिल (एसीसी)सँग क्षतिपूर्ति मागेको छ । वर्षाका कारण खेलको टिकट बिक्री कम भएको पीसीबीको तर्क छ ।
पीसीबीका अध्यक्ष जाका अशरफले नेपाल र भारतबीचको खेलमा कम टिकट बिक्री गरेकोमा एसीसीसँग क्षतिपूर्ति मागेका छन् । एसीसी अध्यक्षमा भारतीय क्रिकेट कन्ट्रोल बोर्डका सचिव जय शाह छन् ।
पीसीबीले गरेको मेलमा टिकट बिक्री कम भएकाले त्यसबाट भएको नोक्सानीको क्षतिपूर्ति दिन एसीसी अध्यक्षलाई भनिएको छ ।
एसिया कपको आयोजना पाकिस्तानले पाएको थियो । तर भारतले पाकिस्तानमा खेल खेल्न अस्वीकार गरेपछि एसिया कप हाइब्रिड मोडलमा आयोजना भएको छ । समूह चरणका तीन खेलसँगै पाकिस्तानमा एक सुपर म्याच खेलिएको छ । अर्कोतर्फ समूह लिगका चार खेल श्रीलंकामा खेलिएका छन् । सुपर फोर र फाइनल गरी ५ खेल खेल्न बाँकी छ ।
यसैबीच, पाकिस्तानमा बुधबार भएको बंगलादेश र पाकिस्तानबीचको सुपर म्याचमा पनि दर्शकको संख्या निकै कम थियो । अन्य खेलमा पनि दर्शक कम देखिएका छन् ।
अब सुपर फोर र फाइनल कोलम्बोमा हुनेछ । कोलम्बोमा केही दिनदेखि वर्षा भइरहेको र बाढीको अवस्था सिर्जना भएको छ । वर्षाका कारण सुपर फोरका धेरै खेलहरु नहुने आशंका छ ।
