काठमाडौं । नेकपा एमालेले नेपाली कांग्रेसका सहमहामन्त्री महेन्द्र यादवमाथि भएको आक्रमणमा आपत्ति जनाएको छ ।
बिहिबार प्रतिनिधि सभाको बैठकमा बोल्दै एमाले सचेतक महेश बर्तौलाले प्रतिपक्ष मात्रै होइन सत्तापक्षका नेताहरूमाथि पनि छानिछानी आक्रमण हुन थालेको बारे प्रधानमन्त्रीले सदनमा आएर जवाफ दिनुपर्ने बताए ।
सहमहामन्त्री यादवमाथिको घटनामा गहिरो अनुसन्धानको माग गर्दै उनले भने, ‘यस्ता घटना देशका विभिन्न ठाउँमा भइरहेका छन्। प्रमुख प्रतिपक्षी दलको नेता आफ्नो निर्वाचन क्षेत्रमा जाँदा धावा बोलिने र आक्रमण हुने श्रृङ्खला पहिलादेखि नै चलिआएको थियो। हिजो प्रतिपक्षतिर हुँदा ध्यान कम थियो होला आज सत्तापक्षका सांसदहरूमाथि खोजी खोजी आक्रमण हुने धारिलो हतियार प्रयोग हुने। त्यसमा सरकारले निर्ममताको साथ अध्ययन गरोस्।’
