काठमाडौ । हाथवे इन्भेष्टमेन्ट नेपालले ५० रुपैयाँ प्रतिकित्ताको दरमा आईपीओ निष्कासन गरेको छ । कम्पनीले आफ्नो जारी पुँजी १ अर्ब १७ करोड रुपैयाँको १२.५० प्रतिशतको दरले भदौ २१ गतेदेखि सर्वसाधारणलाई आवेदन खुला गराएको हो ।
बैदेशिक रोजगारमा गएका, कर्मचारी र सामुहिक लगानी कोषलाई छुट्याएर बाँकी रहेको २४ लाख २७ हजार ७ सय ५० कित्ताका लागि सर्वसाधारणले आवेदन दिन सक्नेछन् । जसमा कम्पनीले सर्वसाधारणलाई न्यूनतम २० कित्ता देखि अधिकतम १ लाखसम्मको आवेदन दिन पाउने अनुमति दिएको छ ।
सर्वसाधारण लगानीकर्ताले कम्पनीको आईपीओमा २५ भदौसम्म आवेदन दिन सक्नेछन् । उक्त अवधिमा माग अनुसार आवेदन नपरेमा भने आवेदन दिने म्याद ४ असोजसम्म थप हुनेछ । कम्पनीको सेयर निष्कासन तथा बिक्री प्रबन्धक ग्लोबल आइएमई क्यापिटल रहेको छ ।
हाथवेले नेपालको पुँजी बजारको अतिरिक्त जलविद्युत्, रियल इस्टेट, आर्थिक, पर्यटन र स्व: पुँजीको क्षेत्रमा आफ्नो लगानीलाई विस्तार र विविधीकरण गरी मुलुकको आर्थिक विकासमा योगदान पुर्याउँदै आएको छ । यस कम्पनीले २०७८ साउन १ गतेदेखि सहायक कम्पनी हाथवे स्टक डिलर लिमिटेडबाट आफ्नो कारोबार गर्दै आएको छ ।
आईपीओपछि कम्पनीमा संस्थापक हिस्सा ८७.५० प्रतिशत र सर्वसाधारण हिस्सा १२.५० प्रतिशत हुनेछ । चालु आर्थिक वर्षको अन्त्य सम्ममा हाथवे इन्भेष्टमेन्टले १३ करोड ५१ लाख ६९ हजार रुपैयाँ खुद नाफा कमाउने जनाएको छ ।
