काठमाडौँ । एसिया कप क्रिकेट प्रतियोगितामा नेपालले आफ्नो क्रिकेट इतिहासमा पहिलोपटक आज भारतसँग प्रतिस्पर्धा गर्दैछ । श्रीलंकाको कान्डीमा रहेको पालेकेले इन्टरनेशनल क्रिकेट स्टेडियममा हुन लागेको खेल नेपाली समय अनुसार दिउँसो ३:१५ बाट सुरु हुनेछ ।
नेपाल र भारतको खेल हेर्न नेपाली क्रिकेट प्रेमीहरु कान्डीमा पुगिसकेका छन् । उनीहरु नेपालका कप्तान रोहित पौडेल र भारतका कप्तान रोहित शर्माबिचको ऐतिहासिक टस हेर्न बेताब देखिन्छन् । जुन नेपाल र नेपालीको लागि महत्वपूर्ण ऐतिहासिक क्षण बन्नेछ । नेपाल र भारतबीचको खेलको हरेक क्षण नेपालका लागि महत्वपूर्ण रहनेछ । तर, आजको खेल बर्षाले बिथोल्ने सम्भावना देखिएको छ । आज पालेकेलेमा ८० प्रतिशत पानि पर्ने सम्भावना रहेको छ ।
नेपालले भारतका सुपरस्टारहरुसँग आफूलाई परिक्षण नगरी स्वदेश फर्किन चाहँदैन । यदि मौसम सफा भयो भने लाखौँ फ्यानहरुको उपस्थितिमा यो नेपालको सबैभन्दा ठूलो खेल हुन सक्छ ।
भारत छिमेकी राष्ट्र भए तापनि उसँग खेल्न नेपालले आफ्नो अन्तर्राष्ट्रिय क्रिकेट इतिहासमा २७ वर्ष कुनुपर्यो । सन् १९९६ बाट अन्तर्राष्ट्रिय क्रिकेट खेल्न सुरु गरेको नेपालले पहिलोपटक भारतसँग खेल्ने मौका पाएको हो । नेपाल र भारत पहिलोपटक सिनियर टोलीमा आमने–सामने हुन लागेका हुन् ।
एसिया कपमा पहिलोपटक सहभागिता जनाएको नेपालले भारतलाई पराजित गर्दै सुपर फोरमा पुग्न चाहन्छ तर विश्व क्रिकेटको पावर हाउस भारतलाई पराजित गर्न नेपाललाई सहज भने हुनेछैन । एसिया कपको यस खेलले समूह ए को सुपर फोरमा पुग्ने दोस्रो टोलीको टुङ्गो लाग्नेछ । समूह ए बाट पाकिस्तान यसअघि नै सुपर फोरमा पुगिसकेको छ ।
फोटो- दिपेन्द्र कुँवर
