काठमाडौं । प्रधानमन्त्री पुष्पकमल दाहाल प्रचण्डले कुर्सी टिकाउनको लागि भ्रष्टाचारको फाइल खोलिएको नभएको स्पष्ट पार्नुभएको छ ।
मंगलबार प्रतिनिधिसभाको बैठकमा रास्वपा सांसद असीम शाहले सोधको प्रश्नको जवाफ दिँदै प्रधानमन्त्रीले सरकार टिकाउनलाई भ्रष्टाचारको फाइल नखोलेको प्रष्ट पार्नुभएको हो ।
उहाँले सबै प्रकारको भ्रष्टाचारको काण्डमा तथ्य र प्रमाणको आधारमा दोषीलाई कानूनको दायरमा ल्याउन सरकार प्रतिबद्ध रहेको बताउनुभयो । ‘यी कामहरू कुनै कुर्सी टिकाउनको लागि होइन। देश र जनतामा राजनीति माथि वितृष्णा छाएको केही हुन्न सबै उस्तै हुन् भन्ने भाषण निर्माण गर्न खोजिएको परिस्थितिलाई चिर्न सरकारले एकपछि अर्को राम्रो काम गर्दै आइरहेको छ’, उहाँले भन्नुभयो ।
भुटानी शरणार्थीसहित सबै काण्डमा राज्यले दबाबरहित ढंगले काम गरेको र सरकारको सोहि कामले जनतामा सुशासन सम्भव छ भन्ने नयाँ आशा पलाएको उहाँको भनाई छ । उहाँले भन्नुभयो, ‘अहिले त्यो सम्बन्धी मुद्दा अदालतमा छ। उचित फैसला गर्छ भन्ने विश्वास लिएको छु। सरकारले भ्रष्टाचार विरोधी अभियान चलाइरहेको छ। भ्रष्टाचारलाई नियन्त्रण गर्न नीतिगत तथा संस्थागत सुधार प्रयास गरिएको छ।’
उहाँले कसैलाई बचाउने कसैलाई फसाउने नियतले काम नगरेको बताउदै दोषी नउम्किन र निर्दोष नफसोस् भन्ने ढंगले काम गर्न निर्देशन भएको बताउनुभयो ।
