काठमाडौँ । राष्ट्रिय स्वतन्त्र पार्टीले उद्योग तथा वाणिज्य र श्रम तथा उपभोक्ता हित समिति को सभापतिमा गणेश पराजुलीलाई उठाउने भएको छ । आज हुनलागेको संसदीय समितिका सभापतिको निर्वाचनमा रास्वपाले पराजुलीको उम्मेदवारी मनोनयन गर्न लागेको हो ।
रास्वपाले तीन बजे उम्मेदवारी दर्ताको तयारी गरेको एक नेताले जानकारी दिए । उद्योग तथा वाणिज्य र श्रम तथा उपभोक्ता हित समितिमा रास्वपाका असीम साह, पार्टीका उपसभापति डोलप्रसाद अर्याल र गणेश पराजुली गरी तीन जना सांसद रहेका छन् ।
‘मिनी पार्लियामेन्ट’का रूपमा लिइने संसदीय समितिको नेतृत्व चयन प्रक्रिया अघि बढेको छ । यसपटक प्रतिनिधिसभाको निर्वाचन भएको नौ महिनापछि मात्र संसदीय समितिको नेतृत्व चयन प्रक्रिया अघि बढेको हो ।
संयुक्त समिति दुई र प्रतिनिधिसभा मातहतका १० विषयगत समितिमध्ये सत्तापक्ष नेपाली कांग्रेसले चार, नेकपा (माओवादी केन्द्र)ले दुई, नेकपा (एमाले) तीन, नेकपा (एकीकृत समाजवादी) एक, जनमत पार्टीले एक सिट पाउने गरी भागबन्डा भइसकेको छ।
राष्ट्रिय मान्यता प्राप्त दल भएपनि रास्व्प्पा र राप्रपालाई भने भागबन्डाबाट अलग गरिएको थियो ।
