काठमाडौँ । पूर्वराष्ट्रपति बिद्यादेबी भण्डारीले बाराको चुरियामाईमा तीर्थयात्रीहरू बोकेको बस दुर्घटनाप्रति दु:ख व्यक्त गर्नुभएको छ ।
दुर्घटनामा परी अमूल्य जीवन गुमाउनुहुने यात्रु महानुभावहरूप्रति हार्दिक श्रद्धाञ्जली अर्पण गर्दै उहाँले मृतकका परिवारजनमा गहिरो समवेदना व्यक्त गर्नुभएको छ ।
पूर्वराष्ट्रपति भण्डारीले उपचाररत घाइतेहरूको शीघ्र स्वास्थ्यलाभको कामना समेत गर्दै नेपालमा बढ्दो यातायात दुर्घटनाबाट मानव जिवनको रक्षाको लागि सम्बन्धित सबैको पक्षको ध्यानाकर्षण गराउनु भएको छ ।
उहाँले वर्षाको यस प्रतिकुल मौसमको समयमा सडक यातायातलाई सुरक्षित र व्यवस्थित बनाउन तदारुकताका साथ समन्वयात्मक रूपमा कार्य गर्न जिम्मेवार निकायहरूको ध्यान आकृष्ट समेत गराउनु भएको छ ।
काठमाडौँबाट जनकपुरतर्फ जाँदै गरेको मधेस प्रदेश ३००१ ख ७९९४ नम्बरको बस आज बिहान २ बजे बाराको जितपुर सिमरा उपमहानगरपालिका–२२ पूर्वपश्चिम लोकराजमार्गको चुरियामाई नजिक दुर्घटना हुदा ७ जनाको मृत्यु भएको थियो ।
