काठमाडौं । माधव नेपाल र झलनाथ खनाल पक्षका सांसदहरुले आज प्रधानमन्त्री एवं नेकपा एमालेका अध्यक्ष केपी ओलीलाई विश्वासको मत नदिने तर सांसद पदबाटै राजीनामा दिने भनिएपनि त्यसमा केही समस्या उत्पन्न भएको छ ।
सो पक्षका केही सांसदहरुले राजीनामा नदिने भएका छन् । यसकारण सो समूहमा अन्तिममा फुट आएको देखिएको छ । सांसद पदबाट राजीनामा दिने विषयमा स्थायी कमिटीका नेताहरू नै विभाजित भएपछि नेकपा एमालेको माधव नेपाल पक्ष संकटमा परेको पछिल्लो सूचना प्राप्त भएको छ ।
नेपाल खनाल समूहका नेताहरु घनश्याम भुसाल,योगेश भट्टराई, सुरेन्द्र पाण्डे, गोकर्ण विष्टलगायतले राजीनामा दिन नहुने बताएका छन् । उनीहरु राजीनामाको विपक्षमा उभिएका हुन् । यसपछि वरिष्ठ नेता नेपाल अप्ठ्यारोमा परेका समाचार स्रोतले जानकारी दिएको छ ।
नेपाल पक्षका सांसदहरूको बैठकमा पनि घनश्याम योगेश पक्षले राजीनामा दिन नहुने बताएको थियो । केही सांसद राजीनामा नदिने भन्दै बैठकबाट बाहिरिएपछि संसद बैठकमा अनुपस्थित हुने भनेर नेताहरु उठेका थिए ।
उनीहरु यसरी बाहिरिएपछि ती नेताहरु अहिले अलग्गै कतै बैठकमा बसेका जनाइएको छ । विश्वासको मत लिने बैठकमा पार्टीको ह्वीप उल्लंघन गरेर अनुपस्थित हुनु कानुनी कारवाहीको विषय भएकाले बैठकमा गएर प्रधानमन्त्रीलाई विश्वासको मत दिनुपर्ने दबाब पार्टीभित्र छ । त्यसैले बैठकमा जाने विषयमा पनि उनीहरु छलफल गरिरहेको अनुमान गरिएको छ ।
समाचार स्रोतका अनुसार सांसदहरूको बैठकअघि आज बिहान पनि पनि नेपाल खनाल पक्षका नेताहरुको जुम बैठक भएको थियो । सो बैठकमा पनि यस समूहका नेताहरूबीच राजीनामा दिने कि ओलीलाई विश्वासको मत दिएर पार्टी एकता जोगाउन अन्ति प्रयास गर्ने भन्ने विषयमा छलफल भयो ।
यस बैठकमा पनि यस समूहका सबै नेताहरुले राजीनामा दिने विषयमा सहमति कायम गर्न सकेका थिएनन् ।
ृउता नेपाल खनाल पक्षका भीम रावल, अष्टलक्ष्मी शाक्य, युवराज ज्ञवाली लगायतका नेता कुनै पनि हालतमा केपी ओलीसँग रहन नसकिने भन्दै राजीनामा दिएर नयाँ पार्टी गठनको प्रक्रियामा जानुपर्ने पक्षमा उभिएका छन् । त्यो बैठकमा उनीहरु यसै विषयमा कुरा राखेका थिए ।
तर त्यसै बैठकमा सुरेन्द्र पाण्डे, घनश्याम भुषाल, योगेश भट्टराई, गोकर्ण विष्टलगायतका नेता विपक्षमा उभिएका थिए । त्यसपछि जुम बैठकमै ती नेताबीच आपसमा बाझाबाझ भएको स्रोतले जनाएको छ ।
