काठमाडौं । प्रधानमन्त्री पुष्पकमल दाहाल ‘प्रचण्ड’ र सभामुख देवराज घिमिरेबिच सदनको अवरोध खुलाउने विषयमा छलफल भएको छ ।
बालुवाटारमा भएको छलफलमा सभामुखले निरन्तररुपमा सदन अवरोध भईरहनु राम्रो होइन भन्दै पहल गर्न प्रधानमन्त्रीको ध्यानाकर्षण गराएका छन् ।
छलफलमा सभामुख घिमिरेले दलीय सहमतिविना सदन अघि बढ्न नसक्ने भन्दै प्राकृतिक विपत्तिलगायतका विषयमा सांसदहरूले बोल्न नपाएको गुनासो गरेका प्रधानमन्त्रीको सचिवालयले जनाएकोे छ ।
‘कम्तीमा सदन खुलाउन सत्तापक्ष र प्रतिपक्षले गम्भीरतापूर्वक छलफल गरिदिनुहोस् । समितिको नेतृत्व चयन हुन सकेको छैन ।’, सभामुखको भनाइ उद्धृत गर्दै प्रधानमन्त्रीको सचिवालयले भन्यो, ‘सभामुखको रुपमा मैले सहमतिका लागि जिम्मेवारीपूर्वक पहल गरेको छु । तर, परिणाममा निस्किन सकेन । शीर्ष नेताहरू नै घण्टौं बस्दा पनि सहमति भएन ।’
यस्तै प्रधानमन्त्री दाहालले पनि संसद खुलाउन आफूले पहल गर्ने र यस विषयमा एमाले नेतृत्वसँग कुरा गर्ने बताए । ‘म पनि सदन खुलाउन भूमिका खेल्छु । तपाईं पनि लाग्नुहोस् । छिट्टै सहमति गर्नैपर्छ । म प्रमुख विपक्षी दलको नेतासँग थप पहल गर्छु ’, प्रधानमन्त्रीले भने ।
६० किलो सुन तस्करी प्रकरणमा सरकारकै संलग्नता रहेको भन्दै उच्चस्तरीय छानबिन समितिको माग गर्दै प्रमुख प्रतिपक्षी नेकपा एमालेले निरन्तर संसद अवरोध गर्दै आईरहेको छ ।
