काठमाडौँ । राष्ट्रिय प्रजातन्त्र पार्टी (राप्रपा)ले धरानमा गोरु काट्ने र सामाजिक सञ्जालमा विद्वेष पैदा गर्ने घटना आपत्तिजनक रहेको बताएको छ ।
सो पार्टीका प्रवक्ता मोहन कुमार श्रेष्ठले एक विज्ञप्ती जारी गर्दै हिन्दुहरुको आस्था र विश्वासमाथि आघात पर्ने गरी सामाजिक सद्भाव खल्बल्याउने नियतबाट उक्त घटना गरिएको भन्दै राप्रपाले दुःख व्यक्त गरेको बताउनु भएको छ ।
‘बहुसंख्यक हिन्दु धर्मावलम्बीको आस्था र विश्वास माथि आघात पुग्ने गरी धरानमा सार्वजनिक रुपमा गोरु काट्नु, भिडियो बनाउनु र सामाजिक सञ्जालमा पोस्ट गर्नु दुःखद र आपत्तिजनक छ ।’ विज्ञप्तीमा भनिएको छ ।
सामाजिक सदभाव खल्बल्याउने गरी भएका यस्ता गतिविधि प्रति राप्रपाको गम्भीर ध्यानाकर्षण भएको पनि जनाइएको छ ।
आपसी एकता, सदभाव र धार्मिक सहिष्णुता नेपालको पहिचान रहेको बताउँदै सदियँदेखि कायम रहेको नेपालको सामाजिक, धार्मिक सदभाव र एकतामा आँच आउन दिनु हुँदैन भन्नेमा राप्रपा प्रष्ट रहेको समेत प्रवक्ता श्रेष्ठले बताउनु भएको छ ।
यस्तै, राप्रपाले उक्त घटनाका सम्बन्धमा गम्भीर बन्न र आवश्यक तदारुकता देखाउन सरकारको गम्भीर ध्यानाकर्षण समेत गराएको छ ।
