काठमाडौँ । यूएईमा काम गरिरहेका एक नेपालीलाई साढे ३ करोड रुपैयाँ बराबरको चिट्ठा परेको छ । २९ वर्षीय तुलसीले १० लाख दिराम बराबरको चिट्ठा जितेका हुन् ।
द गल्फ न्युज डटकमका अनुसार महजुजले आयोजना गर्ने साप्ताहिक चिट्ठाको शनिबार गरिएको १४१ औँ खेपमा उनी भाग्यशाली सावित भएका हुन् । उनले साढे एक वर्षदेखि चिट्ठाको टिकट खरिद गर्दै आइरहेको समाचारमा उल्लेख छ ।
तुलसी विगत ११ वर्षदेखि यूएईको निर्माण कम्पनीमा प्राविधिकको रूपमा काम गर्दै आइरहेका थिए । उनले इमेलमार्फत यो सुखद खबर पाएका थिए ।
जितेको रकमले अब नेपालमा नयाँ घर बनाउने योजना रहेको उनी बताउँछन् । यसअघि पनि नेपालका पदमले करिब ७१ करोड ७७ लाख ८२ हजार बराबरको तथा भरत बिकले झन्डै ३४ करोड ५० लाख नेपाली रुपैयाँ बराबरको चिट्ठा जितेका थिए ।
