एजेन्सी । भारतको सीबीआईले मणिपुर हिंसाका घटनाहरूको अनुसन्धान गर्न ५३ अधिकारीहरूको सूची तयार गरेको छ । जसमा २९ जना महिला रहेका छन् ।
यी अधिकारीहरूलाई देशभरका सीबीआई कार्यालयहरूबाट चयन गरिएको हो ।
यस्ता हिंसाका घटनामा प्रहरी नायव उपरीक्षकलाई अनुगमन अधिकारी बनाउन नमिल्ने भएकाले सीबीआईले तीनजना डीआईजी र एक प्रहरी उपरीक्षकलाई अनुसन्धानको सुपरिवेक्षण गर्न पठाएको छ ।
भारतीय सञ्चारमाध्यमका अनुसार डिआइजी अधिकारीहरुको नाम लवली कटियार, निर्मला देवी र मोहित गुप्ता रहेका छन् । सहनिर्देशक घनश्याम उपाध्यायले सम्पूर्ण अनुसन्धान प्रक्रियाको सुपरिवेक्षण गर्नेछन् । प्रहरी उपरीक्षक राजवीरले उनलाई रिपोर्ट गर्नेछन् ।
अधिकारीका अनुसार यस प्रकारको यति ठूलो संख्यामा महिला अधिकारी एकैसाथ सेवामा खटिएको पहिलो पटक हो । टोलीमा दुई अतिरिक्त महिला प्रहरी उपरीक्षक र ६ महिला नायब उपरीक्षक पनि छन् । यसका अलावा १६ जना निरीक्षक र १० जना सहायक निरीक्षक पनि टोलीमा रहनेछन् ।
सीबीआईलाई मणिपुर हिंसाका १७ वटा मुद्दा अनुसन्धानका लागि सुम्पिएको छ । सीबीआईले अहिलेसम्म ८ वटा मुद्दा दर्ता गरेको छ, जसमा दुई मणिपुरमा कथित महिला यौन दुर्व्यवहारसँग सम्बन्धित छन् ।
सीबीआईमा थप मुद्दा पनि आउन सक्ने अधिकारीहरूले बताएका छन् । यसमा विशेषगरी महिला दुव्र्यवहारका घटना, कुकी महिलाको भाइरल भिडियो समावेश हुनेछन् । यसका साथै गत अगस्ट ९ मा मेइती महिलाको सामूहिक बलात्कारको घटना बाहिर आएको थियो । यसको अनुसन्धान पनि सीबीआईलाई दिन सकिन्छ ।
मणिपुर हिंसामा अहिलेसम्म १ सय ६० भन्दा बढीको मृत्यु भइसकेको छ । जसमध्ये ५९ जना मे ३ देखि ५, २८ मे २७ देखि २९ र ९ जुन १३ मा मारिएका छन् । १६ जुलाईदेखि २७ जुलाईसम्म कुनै हिंसा भएको छैन ।
