काठमाडौँ । भारतको उत्तराखण्डको चामोली जिल्लाको हेलाङमा घर भत्किँदा दुई नेपाली नागरिकले ज्यान गुमाएका छन् । घटनामा अन्य पाँच जना घाइते भएका छन् ।
मंगलबार राति करिब ८ बजे दुई तले घर भत्किएको थियो । घरमा सात जना बसिरहेका थिए । घटना लगत्तै उद्धारको काम सुरु गरिएको थियो ।
मृतकको नाम १९ वर्षीय अनमोल र २१ वर्षीय प्रिन्स भनेर मात्र खुलाइएको छ । उनीहरूमध्ये एक जनाको घटनास्थलमा नै मृत्यु भएको थियो भने एक जनाको बुधबार बिहान उपचारको क्रममा मृत्यु भएको भारतीय सञ्चारमाध्यमले जनाएको छ ।
उद्धार गरिएका अन्य पाँच जनामध्ये दुई जनाको अवस्था गम्भीर रहेको बताइएको छ । क्रसर उद्योग नजिक बनाइएको उक्त घरमा त्यहाँको कामदार बस्ने गरेका थिए ।
