काठमाडौँ । नेपालले भारतबाट चामल मागेको छ । नेपालमा नजिकिँदै गरेको चाडपर्वको सिजनका लागि नेपालले खाद्यवस्तुको अभाव हुन नदिन यस्तो माग गरेको हो ।
वाणिज्य तथा आपूर्ति मन्त्रालयका सहसचिव रामचन्द्र तिवारीले गत साता भारतलाई चामल, चिनी र धान उपलब्ध गराउन आग्रह गरेका थिए ।
नेपालले भारतसँग एक लाख टन चामल, ५० हजार टन चिनी र ५ हजार टन धान उपलब्ध गराउन माग गरेको छ ।
यो कुरा व्यापारीहरुलाई थाहा हुनेबित्तिकै उनीहरुले ठूलो परिमाणमा चामल जम्मा गर्न थालेका छन् । जसका कारण गैर–बासमती चामलको मूल्य बढेको छ । अर्कोतर्फ नेपालले भारतलाई टमाटर आपूर्ति गरिरहेको छ ।
भारतमा टमाटरको मूल्य आकाशिएको छ । यस्तो अवस्थामा नेपालले भारतलाई सहयोगको हात बढाएको छ । गर्मी र वर्षाका कारण भारतमा टमाटरको भाउ बढेको छ ।
जुलाई २० मा, भारतले चाडपर्वको सिजनमा घरेलु आपूर्ति बढाउन र खुद्रा मूल्यहरू नियन्त्रणमा राख्न गैर–बासमती सेतो चामलको आपूर्ति रोक्यो । भारतबाट आपूर्ति हुने करिब २५ प्रतिशत गैर–बासमती सेतो चामल रहेको छ । नेपालमा मुख्यतया चामल खाने भएकाले चामलको अभाव पूर्ति गर्न भारतबाट ठूलो हिस्सा चामल नेपाल भित्रिने गर्छ ।
नेपालले सन् २०२१ अप्रिलदेखि २०२२ मार्चसम्म भारतबाट अहिलेसम्मकै सबैभन्दा बढी १४ लाख टन चामल आयात गरेको थियो । जसमध्ये गैर–बासमती चामल १३.८ लाख टन र बासमती चामल १९ हजार टन रहेको छ ।
भारतको पश्चिम बंगाल धानको प्रमुख उत्पादक हो, जबकि महाराष्ट्र र कर्नाटकले भारतको ५० प्रतिशत भन्दा बढी दाल उत्पादन गर्दछ । भारत विश्वमा सबैभन्दा बढी चामल निर्यात गर्ने देश हो ।
