काठमाडौं । नेकपा एमालेले नेतृत्व चयन नगरेको भन्दै लेखा समितिको बैठक बहिष्कार गरेको छ ।
आज दिउँसो १ बजे बोलाइएको बैठकमा संसदीय समितिको नेतृत्व चयनबारे असन्तुष्टि जनाउँदै बहिष्कार गरेको एमालेका सांसद योगेश भट्टराईले बताए ।
यस्तै, लेखा समितिका सदस्य तथा एमालेका अर्का सांसद गोकुल बास्कोटाले सत्तापक्षमै भागबन्डा नमिलेर आठ महिनासम्म नेतृत्व चयन नगरेको आरोप लगाए । उनले एमालेले भाग नमागेको भन्दै सत्तापक्षमै मिलाएर नेतृत्व टुंग्याउन सुझाव दिए । ‘ विपक्षीलाई कुनै समितिको नेतृत्व गर्न दिन मन नलागे नदिए हुन्छ । तर, समितिहरुलाई संसदको दुई सेसन सकिन लाग्दा पनि पंगु बनाउनु सत्ता पक्षको सर्वसत्तावादी सोचको चरम नमुना हो’, उनले भने ।
बैशाख दोस्रो साता समिति गठन भए पनि दलहरुबीच कुरा नमिल्दा अहिलेसम्म नेतृत्व पाउन सकेको छैन ।
एमालेले बहिष्कार गरेसँगै कोरम नपुगेर आजको लेखा समितिको बैठक स्थगित गरिएको छ ।
