एजेन्सी । भारतीय ब्याट्सम्यान पृथ्वी शा इंग्ल्याण्डमा जारी एकदिवसीय कप प्रतियोगिता २०२३ बाट बाहिरिएका छन् । शा एकदिवसीय कप प्रतियोगितामा नर्थह्याम्प्टनशायरबाट खेल्छन् । आइतबार डरहमविरुद्धको खेलमा फिल्डिङ गर्ने क्रममा उनको घुँडामा चोट लागेको थियो ।
नर्थह्याम्प्टनशायरले एक विज्ञप्तिमा भनेको छ – स्क्यानको नतिजाले देखाएको छ कि चोट धेरै गम्भीर छ ।’ शालाई हाल भारतीय क्रिकेट कन्ट्रोल बोर्ड (बीसीसीआई) को मेडिकल टोलीले निगरानी गरिरहेको छ । यस्तै, शुक्रबार लन्डनमा एक विशेषज्ञलाई भेट्ने कार्यक्रम रहेको छ ।
२३ वर्षीय शाले बुधबार (अगस्ट ९) मा समरसेटविरुद्ध १५३ बलमा २४४ रनको इनिङ्स खेलेका थिए । शाले यस प्रतियोगिताको इतिहासमा सर्वाधिक व्यक्तिगत स्कोरको कीर्तिमान बनाएका छन् । उनले ओली रोबिन्सनको २०६ (२०२२ मा केन्टका लागि) लाई पछि पारेका हुन् ।
