काठमाडौँ । सरकारले सर्वोच्च शिखर सगरमाथासहित अन्य हिमाल आरोहण शुल्क (रोयल्टी) वृद्धि गर्ने तयारी गरेको छ ।
नयाँ संघीय पर्यटन विधेयकसँगै सरकारले पर्वतारोहण सम्बन्धी नियमावली संशोधन गर्दै हिमाल आरोहण शुल्क वृद्धि गर्ने तयारी गरेको पर्यटन विभागका निर्देशक तथा प्रवक्ता युवराज खतिवडाले जनाए ।
पर्वतारोहण सम्बन्धी नियमावली, २०५९ संशोधनसँगै हाल मन्त्रालयले हेर्दै आएको पर्वतारोहण सम्बन्धी स्वीकृति, रोयल्टी संकलन तथा पर्वतारोहण नियमन तथा सुपरिवेक्षणसँगै सम्पूर्ण व्यवस्थापकीय अधिकार पर्यटन विभागलाई प्रत्यायोजन हुने खतिवडाले बताए ।
हाल सगरमाथा आरोहणका लागि नेपाली नागरिकले ऋतु अनुसार १८ हजार २५० रुपैयाँदेखि ७५ हजार रुपैयाँसम्मको शुल्क तिर्छन् भने विदेशीले २ हजार ७५० अमेरिकी डलरदेखि ११ हजार डलरसम्म तिर्छन् ।
यस्तै, सगरमाथाबाहेकका अन्य आठ हजार मिटरसम्मका हिमाल आरोहण गर्दा नेपालीले २ हजार ५ सय रुपैयाँदेखि १० हजार रुपैयाँसम्म तिर्छन् भने विदेशीहरुले ४५० अमेरिकी डलरदेखि १ हजार ८०० डलर तिर्छन् ।
त्यसैगरी, ७ हजार ९९९ मिटर भन्दा तल उचाइ भएकाका हिमाल आरोहण गर्दा रेञ्ज हेरी रोयल्टी लाग्ने गर्छ ।
