काठमाडौँ । राष्ट्रिय क्रिकेट टिमका स्पिनर सन्दीप लामिछानेविरुद्धको मुद्दाको पेसी बिहिबार तोकिएको छ । साउन ३२ गते बिहिबार अन्तिम सुनुवाइ भनिएको उक्त पेसीमा कुनै फेरबदल नआए सोही दिन सन्दीपको मुद्दाले किनारा लाग्नेछ । उक्त दिनको पेशी सूचीमा उनको मुद्दा पहिलो नम्बरमा परेको छ ।
सर्वोच्च अदालतले फास्ट ट्र्याकबाट मुद्दाको फैसला गर्न आदेश दिए्पनि जिल्ला अदालतका न्यायाधीशहरुले तदारुकता नदेखाएपछि विभिन्न बहानामा पेसि सर्दै आएको छ ।
नेपाली क्रिकेट टीमले अगष्ट ३० (भदौ १३ गते) बाट सुरु हुने एसिया कप क्रिकेट खेल्दैछ । सोमबार नेपाल क्रिकेट सङ्घ (क्यान) ले स्पिनर सन्दीपसहित एसिया कप खेल्ने १७ सदस्यीय टोलीको नामको घोषणा गरिसकेको छ । तर, सन्दीपको मुद्दाले भने अझै किनारा पाउने नपाउने टुङ्गो हुन सकेको छैन ।
नेपालको खेलमा सन्दीपको उपस्थिती मत्वपूर्ण रहेकोले उनीबिना भारत र पाकिस्तानजस्ता शक्तिशाली राष्ट्रहरुविरुद्धको भिडन्तमा टिमको मनोबल कमजोर हुने नेपाल क्रिकेट संघका अधिकारीहरु पनि स्वीकार्छन् । ‘हामी पनि उहाँको मुद्दा चाँडो छिनोफानो होस भन्ने पक्षमा छौं । अहिलेको अवस्थामा सन्दीप बिनाको नेपाली टीम सोच्न पनि सकिँदैन’, एक पदाधिकारीले भने ।
सन्दीपको उत्कृष्ट प्रदर्शनमा नै नेपालले विश्वकपको ग्लोबल क्वालिफायरमा पुर्याउन, एक दिवसीय मान्यता कायम राख्न तथा एसीसी प्रिमियर लिग जित्दै एसिया कपमा स्थान बनाएको थियो । उनले हालै क्यानडामा आयोजित ग्लोबल टी–२० मा सर्रे जगुअर्सबाट खेल्दै उत्कृष्ट प्रदर्शन गरेका थिए ।
जबरजस्ती करणी गरेको आरोप पक्राउ परेका सन्दीपलाई जिल्ला अदालत काठमाडौंले थुनामा राखेर अनुसन्धान गर्न आदेश दिएको थियो । तर, उच्च अदालत पाटनले सो आदेश उल्टाउँदै सन्दीपलाई सशर्त रिहा गरिदिएको थियो । पछि सर्वोच्चले उच्चको आदेश कायम राख्नुका साथै सन्दीपलाई विदेश गएर खेल्ने समेत अनुमति दिएको थियो ।
२०७९ कात्तिक १४ गते काठमाडौँ जिल्ला अदालतमा दर्ता भएको लामिछानेविरुद्धको मुद्दामा हाल २४ पटक पेसी चढिसकेको छ ।
सर्वोच्च अदालतको आदेशमा उक्त मुद्दालाई छिटो सुनुवाइ गर्नु भनी आदेश भएपछि काठमाडौँ जिल्ला अदालतले बिहिबारलाई अन्तिम सुनुवाइको मिति भनेको छ । बिहीबार मुद्दाको सुनवाइ भएन भने सन्दीपको एसिया कप प्रभावित बन्न सक्छ ।
