काठमाडौं । नेपाल इन्भेष्टमेण्ट र हिमालय बैंकबीच बिहीबार (आज) दिउँसो ३ बजे मर्जरका लागि एमओयूमा हस्ताक्षर हुने भएको छ । काठमाडौंको ठमलेस्थीत अलोफ्ट होटेलमा नेपाल इन्भेष्टमेण्टका सञ्चालक समिति अध्यक्ष पृथ्वीबहादुर पाँडे र हिमालयन बैंकका अध्यक्ष तुलसीप्रसाद गौतमले समझदारीपत्र (एमओयू) मा हस्ताक्षर गर्ने भएको हो ।
बिहीबार विहानै एमओयूमा हस्ताक्षेर हुने भने पनि साताको अन्तिम दिनको सेयर कारोबार प्रभावित हुने भन्दै ३ बजेपछिका लागि कार्यक्रम तय गरिएको बैंक स्रोतले बताएको छ । आइतवारबाट भने यी दुई बैंकको दोस्रो बजारमा सेयर कारोबार बन्द हुनेछ ।
उक्त बैंकको मर्जरपछि ३-३ जना सञ्चालक राख्ने र थप १ जना स्वतन्त्र सञ्चालक मनोनित गर्ने सहमति भएको जनाएको छ । दुई बैंक एक भएपछि सञ्चालक समिति अध्यक्षमा पृथ्वीबहादुर पाँडे र प्रमुख कार्यकारी अधिकृत (सीईओ) मा अशोक राणा रहने छन् । इन्भेष्टमेण्टका सीईओ ज्योतिप्रकाश पाण्डे भने मर्जरपछि डेपुटी सीईओको भूमिकामा रहने छन् ।
यी दुई बैंकले ढिलोमा पनि आगामी असोजअघि नै एकीकृत कारोबार थाल्नेगरी समझदारी बनेको बैंक स्रोतले जानकारी दिएको छ । बैंकको मर्जर हुँदा नेपाल इन्भेष्टमेण्टका लगानीकर्तालाई फाइदा हुने देखिएको छ । डीडीएका इन्भेष्टमेण्ट बैंकको सम्पत्ती हिमालयनको तुलनामा कम देखिएको सम्बद्ध स्रोतको दाबी छ । इन्भेष्टमेण्टको पूँजी बढी भएका कारण प्रतिसेयर सम्पत्ती कमी देखिएको हो ।
प्रतिकित्ता सम्पत्तीको मूल्यांकन कति आएको छ भन्ने प्रस्ट नपारिएको भए पनि करीब ५ प्रतिशतको अन्तर देखिएको स्रोतको दाबी छ । यद्यपी, दुबै बैंक समान हैसियत (सेयर स्वाप १/१ को अनुपात) मा मर्जरमा जाने सहमति जुटेको छ ।
