काठमाडौँ । जनता समाजवादी पार्टी, नेपालका सांसद प्रदीप यादवले प्रमुख प्रतिपक्ष दल नेकपा(एमाले)ले संसदमाथि खेलवाड गरेको बताउनुभएको छ ।
सोमवार संसद बैठकपछि सञ्चारकर्मीहरुसँग कुराकानी गर्दै सांसद यादवले प्रमुख प्रतिपक्ष दल एमालेले संसद अवरोध गरेर संसदमाथि खेलवाड गरेको बताउनुभएको हो । उहाँले यतिखेर संसद अवरोध गर्नु जायज नभएको भन्दै संसद अवरोध गर्न एमालेले नाटक रचेको बताउनु भयो । उहाँले सुन तस्करी प्रकरणको छानबिन गर्न समिति बनाउनु आवश्यक नभएको बताउनु भयो । उहाँले समिति बनाए प्रतिवेदन थन्क्याएर राख्ने बाहेक काम नहुने भन्दै अपराधिक घटनाको छानबिन गर्ने काम नेपाल प्रहरीको भएको बताउनु भयो । उहाँले प्रहरीमाथि विश्वास गर्नुपर्ने बताउनु भयो ।
उहाँले भन्नुभयो – ‘संसद अवरोध प्रमुख प्रतिपक्षले गरेको छ । संसदलाई खेलवाडका रुपमा प्रमुख प्रतिपक्षले हेरेको छ । संसद जनताको प्रतिनिधित्व गर्ने संस्था हो । जनताको न्यायको मन्दिर हो । समसामयिक मुद्दामा यहीँबाट बहशको थालनी हुन्छ । देशमा बाढी, पहिरोले धेरै जनधनको क्षति भएको छ । यो संसद चलाउनुको साटो संसद अवरुद्ध गर्नु जायज कुरा होइन । प्रमुख प्रतिपक्षले नाटक रचेको छ । छानबिन टोली बनाएर के गर्ने ? खालि त्यो प्रतिवेदन थन्क्याएर राख्ने । अरु के हुन्छ नेपालमा ? छानबिन टोली बन्छ । प्रतिवेदन थन्क्याएर राखिन्छ । अरु कुनै काम हुन्छ र ? अपराधिक घटनाको छानबिन गर्ने काम नेपाल प्रहरीको हो । गर्दैछ । प्रहरीमाथि विश्वास गरौँ ।’
सांसद यादवले गौर हत्याकाण्डको विषयलाई उठाएर जसपामाथि षड्यन्त्र र घेराबन्दी गर्न खोजिएको बताउनु भयो । उहाँले तत्कालिन माओवादीको हठका कारण गौर हत्याकाण्ड भएको बताउनु भयो । उहाँले सो घटनाको छानबिन दुईवटा उच्चस्तरीय समितिले गरेको भन्दै छानबिन समितिले सरकारलाई दिएको प्रतिवेदन सार्वजनिक गर्न प्रधानमन्त्रीलाई आग्रह गर्नुभयो ।
