काठमाडौँ । प्रहरीको केन्द्रीय अनुसन्धान ब्युरो (सिआईबी)ले नक्कली भनेर पक्राउ परेका डाक्टर सक्कली निस्किएका छन् ।
सिआईबीले साउन २५ मा नक्कली शैक्षिक प्रमाणपत्रको आधारमा काम गरेको भन्दै पक्राउ गरेको डा. रञ्जित कुमार यादव ‘सक्कली’ प्रमाणित भएका छन् ।
नाम जुधेको आधारमा सीआईबीले डा. रञ्जितलाई पक्राउ गरेको मेडिकल काउन्सिलका रजिस्टार डा. कृष्ण प्रसाद अधिकारीले बताए । डा. रञ्जित र सीआईबीको खोजी सूचीमा रहेका चिकित्सक नाम जुधेका दुईजना अलग मानिस रहेका अधिकारीले जनाए । उनले यसबारे आफूले सिआईबीलाई पत्र लेखिसकेको बताए ।
सिआईबीले महोत्तरीको पिपरा–८ घर भएका डा. रञ्जितलाई काठमाडौँबाट पक्राउ गरेर म्याद लिएर अनुसन्धान गरिरहेको छ ।
ब्युरोले यस प्रकरणमा नेपाली कांग्रेसका सांसद सुनिल शर्मा सहित ८ जनालाई पक्राउ गरेको थियो । शर्मालाई जिल्ला अदालतले तारेखमा राखेर रिहा गरेको छ भने अरू ७ जना चिकित्सक सीआईबीको हिरासतमा छन् ।
