काठमाडौँ । नेकपा (एमाले) का अध्यक्ष केपी शर्मा ओलीले नेपालमा दैनिक सय किलो अवैध सुन भित्रिरहेको दाबी गर्नुभएको छ ।
आइतबार पार्टी केन्द्रीय कार्यालय च्यासलमा आयोजित पत्रकार सम्मेलनमा उहाँले दिनकै सय किलो सुन विभिन्न भन्सारबाट अवैध तरिकाले नेपाल भित्रिरहेको बताएउनुभएको हो ।
अहिले भन्सारमा जे छुँदा पनि सुन नै निस्किने दाबी गर्दै भन्नुभयो, “ब्रेक सु छोयो सुन, सिगरेट छोयो सुन, एउटा मोटर ल्यायो सुन, एउटा आइटम सुन अर्को आइटम सुन, जे ल्याउँदा नि सुन ।”
कैयौँ भन्सारमा चेकजाँच नै नहुने उहाँको भनाइ थियो । त्यसैले राजश्व कम उठेको उहाँले बताउनुभयो । “अरू नाकाहरू चेक नै भएको छैन। राजश्व किन उठ्दैन, किनभने भन्सारबाट कारोबार नै हुँदैन”, उहाँले भन्नुभयो ।
यी सबै कुरामा सरकारको संलग्नता के छ राम्ररी हेर्न र छानबिनका लागि एमालेले समिति बनाउन माग गरेको तर, सरकार पहिल्यै डराएको अध्यक्ष ओलीले बताउनुभयो ।
