काठमाडौँ । प्रमुख प्रतिपक्ष नेकपा (एमाले) का अध्यक्ष केपी शर्मा ओलीले सुन तस्करीमा सरकारको संलग्नता नभए उच्चस्तरीय छानबिन आयोग बनाउन सरकार किन तर्सिएको भनी प्रश्न गर्नुभएको छ ।
आइतबार पार्टी कार्यालयमा आयोजित पत्रकार सम्मेलनमा उहाँले सरकारले निष्पक्ष छानबिन आयोग गर्न डराएको भन्दै प्रश्न गर्नुभयो, “सरकारको अयोग्यता, नालायकीपन वा लाचारी के हो ? सुन तस्करीमा सरकारको संलग्नता छैन भने किन तर्सिन्छ ? हामीले आफ्ना कार्यकर्ता राखेर होइन, न्यायिक छानबिन भनेका छौँ ।”
पूर्वप्रधानमन्त्री ओलीले बहलवाला वा पूर्वन्यायाधीशको नेतृत्वमा स्वतन्त्र छानबिन आयोग गठन गर्नुपर्ने माग गर्नुभयो । “एसपीको नेतृत्वमा छानबिन गर्दा एसएसपीले यसो नगर्नु भनेपछि गर्न सक्दैन । गोल्डेन टच पो भयो यो त । ब्रेक सु छोयो अर्को छोयो सुन भन्सारबाट जे ल्याउँदा पनि सुन यस्तो अवस्थामा देश छ”, उहाँले भन्नुभयो ।
