काठमाडौं: संयुक्तराज्य अमेरिकाको पर्यटकीय हवाई राज्यमा भएको भिषण आगलागीमा परेर ५३ जनाको मृत्यु भएको छ ।
समाचार संस्था एपी र बिबिसीका अनुसार हवाईको माउई टापुमा भएको आगलागीबाट १००० भन्दा बढी घरहरुमा क्षति पुगेको छ ।
पछिल्लो समय अत्यन्त धेरै गर्मी बढेसँगै आगलागी शुरु भएको थियो । हवाईका गभर्नर जस ग्रीनका अनुसार आगलागी अझै पूर्ण नियन्त्रणमा आउन सकेको छैन । अनियन्त्रित डढेलोको रुप लिएको यस आगलागीबाट बच्न कतिपय मानिसहरु समुद्रमा हाम फालेका थिए ।
गभर्नर ग्रीनले मृतकको संख्या अझ बढ्न सक्ने बताउनु भएको छ । उहाँले आगलागी भएको क्षेत्रमा खोजी र उद्धारको कार्य जारी रहेको पनि बताउनुभयो । सन् १९६१ यताकै यो सबैभन्दा घातक प्राकृतिक विपदा हो । त्यसबखत बीग आइल्यान्डमा सुनामीका कारण ६१ जनाको ज्यान गएको थियो ।
