काठमाडौं । ग्लोबल टी-२० क्यानडा २०२३ को उपाधि नेपाली क्रिकेट टोलीका अलराउन्डर दीपेन्द्रसिंह ऐरी सम्मिलित मोन्ट्रियल टाइगर्सले जितेको छ ।
आईतबार भएको फाइनल खेलमा स्पिनर सन्दीप लामिछाने सम्मिलित सर्रे जगुअर्सलाई ५ विकेटले हराउँदै टाइगर्सले अन्तिम बलमा ट्रफि आफ्नो नाम गरेको हो ।
जितको लागि १ सय ३१ रनको विजयी लक्ष्य पछ्याएको टाइगर्सलाई अन्तिम ६ बलमा जितमा १३ रन चाहिँएको थियो । आन्द्रे रसेलले अन्तिम बलमा दुई रन चाहिँदा छक्का हान्दै खेल जिताएका थिए । त्यसअघि दोस्रो बलमा पनि रसेलले छक्का हान्दै जितको सम्भाबना बलियो बनाएका थिए ।
रसेल ६ बलमा १चौका र २ छक्कासहित २० रनमा नट आउट रहे । दीपेन्द्र १६ रन बनाएर आउट भएपछि रसेललाई मौका दिएका थिए । यस्तै, शेर्फान रदरफोर्ड ३८ रनमा नट आउट रहदा क्रिस लिन ३१ र दीलप्रित सिंह १४ रनमा आउट भए ।
बलिङ तर्फ सर्रेका इफ्तिखर अहमदले ४ ओभरमा ८ रन खर्चेर २ विकेट लिए । सन्दीपले ३ ओभरमा २० रन दिए भने विकेट लिन सकेनन् ।
टस हारेर पहिला ब्याटिङको निम्तो पाएको सर्रेले निर्धारित २० ओभरमा ५ विकेट गुमाउँदै १ सय ३० रन बनाएको थियो । सर्रेका ओपनर जतिन्दर सिंहले सर्वाधिक ५६ रन बनाउदै नटआउट रहे । आयन खानले २६ रन बनाए भने अन्य ब्याटरले भने राम्रो प्रदर्शन गर्न सकेनन् ।
टाइगर्सका आयन खानले ४ ओभरमा २१ रन खर्चेर २ विकेट लिदा कार्लोस ब्रेथवेट, अब्बास अफ्रिदी र आन्द्रे रसेलले समान एक विकेट लिएका थिए ।
