काठमाडौँ । नेकपा (एकीकृत समाजवादी) का वरिष्ठ नेता झलनाथ खनालले नेकपा (एमाले) को नेतृत्वसँग पार्टीको वैचारिक अन्तरविरोध चर्को भए पनि राजनीतिक शक्तिको हिसाबले ऊसँगको अन्तरविरोध पनि मित्रतापूर्ण अन्तरविरोध नै रहेको बताउनुभएको छ ।
एकीकृत समाजवादीको जारी स्थायी कमिटी बैठकमा १६ पृष्ठको दस्तावेज प्रस्तुत गर्दै उहाँले एमालेलाई ‘शत्रु शक्ति’ जस्तो ठानेर दक्षिणपन्थी शक्तिलाई ‘मित्र’ ठान्ने र एमालेलाई ‘मुख्य निशाना’ ठान्ने दक्षिणपन्थी दृष्टिकोणबाट एकीकृत समाजवादी सर्तक रहनुपर्ने बताउनुभयो । आजको मुख्य संघर्ष नै दक्षिणपन्थी र वामपन्थी बीचको संघर्ष रहेको उहाँको भनाइ छ ।
एमालेबाट विद्रोह गरेको शक्ति अहिले आफूहरूसँग नभएको उल्लेख गर्दै नेता खनालले दस्तावेजमा विगत दुई वर्षको अनुभवहरुको निर्मम ढङ्गले समीक्षा गर्नुपर्ने र गलत दृष्ट्रिकोण नीति र अडानबाट पार्टीलाई मुक्त गर्नुपर्ने उल्लेख गर्नुभएको छ ।
“हामीले हाम्रो पार्टीलाई दक्षिणन्थी कार्यदिशाबाट नभई प्रष्टरुपले क्रान्तिकारी कार्यदिशा, नीति र सिद्धान्तका आधारमा अघि बढाउनुपर्छ”, दस्तावेजमा भनिएको छ, “पार्टीका सही वैचारिक–राजनीतिक कार्यदिशा,नीति,सिद्धान्त, लक्ष्य, क्रान्तिकारी कार्यशैली,कार्य पद्धति र विधि विधानका आधारमा पार्टीको महाअधिवेशन यथाशीघ्र गर्नुपर्छ, हामीले यो कार्यदिशाबाट अघि बढ्ने हो भने छोटो समयमा आशातित परिवर्तन अनिवार्य छ ।”
एकीकृत समाजवादी र विद्रोह गरिएको पार्टी ९एमाले०का सैद्धान्तिक र नीतिगत सवालमा भिन्नता भिन्नता देखाउन नसकिएको चर्चा गर्दै दस्तावेजमा भनिएको छ, “हाम्रो पार्टीमा पनि जबजकै धङधङी छ र एमालेमा पनि जबज कै धङधङी छ । त्यसले गर्दा पनि ठूलो संख्यामा विद्रोह गरेर अघि आएका नेता कार्यकर्ताहरु वैचारिक–सैद्धान्तिक भिन्नता नदेखेर एमालेमा फर्किने क्रम देखिन्छ ।”
Jhalanath Khanal Doc
