काठमाडौं । नेपाली गायक तथा कलाकार रोबिन तामाङ हिन्दी सिरिज द लास्ट आवरमा खलनायकको भूमिकामा देखा परेका छन् ।
नेपाली फिल्ममा प्रायः भिलेनको भूमिकामा निर्वाह गर्दै आएका उनको अभिनय रहेको हिन्दी वेव सिरिज ‘द लास्ट आवर’ शुक्रवारबाट ओटीटी प्लेटफर्ममा रिलिज भएको छ ।
‘पे पर भ्यू’ मार्फत् अमेजन प्राइम भिडियोमा सार्वजनिक भएको सिरिजमा उनी भिलेनको भूमिकामा देखिएका हुन् । उनलाई सिरिजको ट्रेलरमा भने स्थान दिइएको थिएन ।
आठ एपिसोड लामो यो सिरिजमा रोबिन यामानाडु नामको तान्त्रिकको भूमिकामा छन् । भारतको उत्तरपूर्वी राज्य (सिक्किम) को पृष्ठभूमिमा आधारित सिरिजको छायांकन सिक्किम र मुम्बईमा गरिएको छ । सिरिजमा भारतमा बस्ने थुप्रै नेपाली कलाकारहरुको अभिनय रहेको छ ।
सिरिजको निर्देशन अमित कुमारले गरेका हुन् । सिरिजमा सञ्जय कपुर, कर्मा ताकपा, साहना गोस्वामी, राइमा सेनलगायतको भूमिका रहेको छ ।
