काठमाडौँ । प्रमुख प्रतिपक्षी दल नेकपा (एमाले)ले गण्डकी बाहेक प्रदेशहरुको अधिवेशनको मिति तोकेको छ ।
पार्टी केन्द्रीय कार्यालय सचिव डा भीष्म अधिकारीका अनुसार गण्डकी प्रदेशको बैठक बस्न बाँकी रहेकाले मिति तोक्न बाँकी छ । अरू प्रदेशहरुले अधिवेशनको मिति टुंगो लागिसकेको छ ।
उहाँले कोशी प्रदेशको अधिवेशन असोज १२–१३, मधेश प्रदेशको असोज ५–६ र बागमती प्रदेशको असोज ८–९ मा अधिवेशन हुने जानकारी दिनुभयो ।
लुम्बिनी, कर्णाली र सुदूरपश्चिम प्रदेशले भदौभित्रै अधिवेशन गर्ने निर्णय भएको छ । जसअनुसार भदौ १६–१७ मा लुम्बिनी, भदौ २९–३० मा कर्णाली र भदौ २२–२३ मा सुदूरपश्चिम प्रदेशले अधिवेशनको मिति तोकेको छ ।
अहिले कायम रहेको प्रदेश संगठन कमिटीले प्रथम अधिवेशनको मिति तोकेको हो । अधिवेशनमा एक सय संगठित सदस्य बराबर एक प्रतिनिधि हुनेछ र प्रतिनिधिमध्ये ३३ प्रतिशत महिला अनिवार्य गर्ने, उत्पीडित समुदाय र मजदुरलाई कोटामा प्रतिनिधि ल्याउने तयारी गरिएको छ ।
यही साउन १५ गते प्रतिनिधि प्रक्रियाको चयन एमाले संगठन विभागले अभिलेखीकरण गर्ने सदस्यताको आधारमा हुनेछ । “पार्टी सदस्यको अन्तिम नामावली तयार भएपछि त्यसै आधारमा अधिवेशनको प्रतिनिधि चयन हुनेछ, प्रतिनिधि छनोट पनि त्यसैमा आधारित हुनेछ”, कार्यालय सचिव अधिकारीले भन्नुभयो ।
एमालेले आगामी एक वर्षभित्रै प्रदेश, जिल्ला र पालिका अधिवेशन गर्ने तालिका तय गरेको छ । सो अनुसार सबैभन्दा पहिले प्रदेश अधिवेशन गर्ने तयारीमा पार्टी पंक्ति परिचालित भएको हो ।
प्रदेशपछि जिल्ला र पालिका तहको अधिवेशन हुनेछ । त्यसका लागि एमालेले फरक भूगोलका नेताहरुलाई जिल्ला इन्चार्ज बनाएर पठाएको छ भने प्रदेशको इन्चार्ज पार्टी सचिवहरुलाई जिम्मा दिएको छ ।
