काठमाडौं । कांग्रेस महामन्त्री डा. शशाङ्क कोइरालाले प्रधानमन्त्री र राष्ट्रपतिको मिलेमतोमा गरिएको संसद विघटनले जनताको अभिमतमाथी कुठाराघात गरेको बताएका छन ।प्रधानमन्त्री र राष्ट्रपतिको पछिल्लो कदमपछी बिज्ञप्ती जारी गर्दै महामन्त्री कोइरालाले यस्तो बताएका हुन ।
राष्ट्रपतिले आह्वान गरे अनुरुपनै कांग्रेस सभापती शेर बहादुर देउबाको नेतृत्वमा सरकार बनाउन बहुमतको हस्ताक्षरसहित पेश गरिएको दाबिलाई पन्छाउदै मध्य रातमा संसद विघटन गरिनु झालझेलपुर्ण ,असंवैधानिक र अलोकतान्त्रिक भएको डा.कोइरालाले बिज्ञप्तिमार्फत दाबी गरेका छन ।
संविधानको धारा ७६ सरकार गठनका लागी भएको र उक्त धाराले संसद विघटनको परिकल्पना नगरेको भन्दै कोइरालाले बैकल्पिक सरकार बन्ने सम्भाबना हुँदा हुँदै संसद विघटन गरिनु संविधानको खिलाफमा रहेको पनि स्पस्ट पारेका छन ।
देशले कोरोना महामारीका झेलिरहेका बेला मुलुकलाई असंवैधानिक तवरबाट निर्वाचनमा धकेल्नु आपत्तिजनक भएको कोइरालाले बिज्ञप्तिमा उल्लेख गरेका छन । महामन्त्री डा. कोइरालाले प्रधानमन्त्री र राष्ट्रपतिको असंवैधानिक र अलोकतान्त्रिक कदमको बिरोध गर्दै संविधानको रक्षा गर्न र देशलाई अन्योलतातर्फ जानबाट बचाउन पनि सबैलाई आग्रह गरेका छन ।
नेपाली कांग्रेसले प्रधानमन्त्री र राष्ट्रपतिको मिलेमतोमा गरिएको संसद विघटनलाई असंवैधानिक र अलोकतान्त्रीक ठहर गर्दै राजनीतिक र कानुनी लडाईं लड्ने निर्णय गरिसकेको छ ।प्रधानमन्त्री र राष्ट्रपतिको संविधान उलङ्घनको पछिल्लो शृङ्खलालाई कानुनबिदहरुले समेत असंवैधानिक भनेका छन भने सामाजिक सञ्जालमा प्रधानमन्त्री र राष्ट्रपतिको चर्को आलोचना शुरु भएको छ ।
