काठमाडौँ । उपप्रधानमन्त्री एवं गृहमन्त्री नारायणकाजी श्रेष्ठ आकस्मिकरुपमा त्रिभुवन अन्तर्राष्ट्रिय विमानस्थल पुगेर एक क्विन्टल सुन बरामद भएको स्थानको निरीक्षण गर्नुभएको छ ।
प्रहरी प्रमुखसँगै पुग्नुभएका गृहमन्त्री श्रेष्ठले सुन बरामद भएको स्थलको अनुगमन गर्नुभएको हो । उहाँसँग प्रहरी प्रमुख बसन्तबहादुर कुँवर, त्रिभुवन अन्तर्राष्ट्रिय विमानस्थलका महाप्रबन्धक प्रतापबाबु तिवारी पनि निरीक्षण सहभागी हुनुहुन्छ ।
मंगलबार राति हङकङबाट ल्याइएको कार्गोमा मोटरसाइकल र स्कुटरको ब्रेक सु भनिएका ३२० थानभित्र सुन लुकाइएको तथ्य सामान भन्सारबाट बाहिरिएपछि खुलेको थियो । सुन भनिएको ब्रेक सुलाई हिजो दिउँसोदेखि नेपाल राष्ट्र बैंक टक्सार महाशाखाको ढुकुटीमा राखिएको छ ।
