काठमाडौं। राजस्व अनुसन्धान विभागले त्रिभुवन अन्तर्राष्ट्रिय विमानस्थल भन्सार कार्यालयबाट बरामद गरेको सुनको परिमाण बुझ्न राष्ट्र बैंक पठाउने तयारी गरेको छ।
विमानस्थलबाट बरामद गरेको सुन जडित मोटरसाइकलको स्पेयर पार्टस् (डिस्क ब्रेक सु) बाट सुन निकालेर परिमाण यकिन गर्न राष्ट्र बैंक पठाउने तयारी गरिएको विभागका प्रवक्ता नवराज अधिकारीले जानकारी दिए।
विभागले बुधबार साँझ भन्सार पास गरेर लैजान लागेको अवस्थामा सुन जडित ब्रेक सु बरामद गरेको थियो। बरामद सुनको परिमाण झण्डै १०० किलो रहेको बताइएको छ।
मोटरसाइकलको स्पेयर पार्टस् (डिस्क ब्रेक सु) रेडी ट्रेड प्रालीको नाममा नेपाल भित्रिएको विभागले जनाएको छ। यस प्रालीका प्रमुख दिलिप भुजेल रहेका छन्।
राजस्व अनुसन्धान विभागले सुन बरामद प्रकरणमा छ जनालाई पक्राउ गरिसकेको छ । यसबारे छानबिन गर्न भन्सार विभागले समिति गठन गरेको छ ।
