काठमाडौँ । गौर हत्याकाण्डका दोषीलाई कानूनबमोजिम अविलम्ब कारबाही गर्न उक्त हत्यकाण्डका पीडितहरुले माग गरेका छन् ।
गौर हत्याकाण्ड पीडित संघर्ष समितिले आज रौतहटका प्रमुख जिल्ला अधिकारीलाई ज्ञापन पत्र दिँदै अमानवीय र विभत्स हत्या गर्ने गौर हत्याकाण्डका हत्यारा अपराधीहरुलाई वर्षौंसम्म अनुसन्धानको दायरामा ल्याई कारबाही नगर्नाले पीडितहरुको पीडा बोध भएको बताएको छ ।
समितिका संयोजक रुपसागर देवीले उक्त हत्याकाण्डका अपराधीहरुलाई कारवाही नगरे विभिन्न संघर्षका कार्यक्रमहरु अगाडि बढाउने जानकारी दिनुभएको छ ।
नेपालको संविधानअनुसार अपराध पीडितहरुलाई आफू पीडित भएको मुद्दाको अनुसन्धान तथा कारबाहीसम्बन्धी जानकारी पाउने हक हुने भन्दै ज्ञापनपत्रमा अपराध पीडितलाई कानूनबमोजिम सामाजिक पुनःस्थापना र क्षतिपूर्तिसहितको न्याय पाउने हकको समेत उल्लंघन भएको उल्लेख छ ।
“न्याय इन्साफ पाउनलाई सम्मानित सर्वोच्च अदालत प्रक्रियालाई अगाडि बढाउन मात्र परमादेशको मागसहित निवेदन दर्ता भएको अवस्था रहेको छ”, ज्ञापन पत्रमा भनिएको छ ।
उक्त घटना प्रचलित नेपाल कानूनबमोजिम मात्र अपराध नभई नेपाल पक्ष रहेको टर्चर कन्भेसनलगायत अन्य अन्तर्राष्ट्रिय महासन्धिसमेतले यस्ता प्रकारको जघन्य अपराधलाई अन्तर्राष्ट्रिय अपराधका रुपमा स्वीकार गरेको अवस्था रहेको ज्ञापन पत्रमा बताइएको छ ।
विसं २०६३ चैत ७ गते रौतहटको गौरस्थित राइसमिल चौरमा दिउँसो १ः४५ बजे तत्कालीन नेकपा माओवादीले गरेको सभामा उपेन्द्र यादव नेतृत्वको तत्कालीन मधेसी जनअधिकार फोरमका कार्यकर्ताले आक्रमण गर्दा २८ जनाको मृत्यु भएको थियो ।
