काठमाडौँ । नेपाली राष्ट्रिय फुटबल टिमका कप्तान किरण चेम्जोङले भारतीय क्लब पञ्जाब एफसीसँगको सम्झौता नवीकरण गरेका छन् ।
उनले पञ्जाबसँग एक वर्षको सम्झौता नवीकरण गरेका हुन् ।
पञ्जाब गत सिजन मात्रै इन्डियन सुपर लिग (आईएसएल)मा बढूवा भएको थियो । नयाँ सम्झौतासँगै चेम्जोङ कम्तीमा पनि २०२३–२४ सिजनको अन्त्यसम्म पञ्जाबमा रहनेछन् ।
३३ वर्षीय चेम्जोङले गत सिजन पञ्जाबलाई आई–लिगको उपाधि जिताउन महत्त्वपूर्ण भूमिका खेलेका थिए । उनी २०२०–२१ सिजनको उत्कृष्ट गोलकिपर घोषित हुँदै गोल्डेन ग्लोभ्स अवार्ड समेत जितेका थिए ।
अनन्त तामाङपछि इन्डियन सुपर लिग खेल्ने उनी दोस्रो नेपाली खेलाडी हुनेछन् ।
