एजेन्सी । लगातार वर्षाका कारण भारतको राजधानी दिल्लीमा डुबान भएको छ । हरियाणाको हथनी कुण्ड ब्यारेजबाट पानी छोडेपछि यमुना नदीको पानीको सतह बढेपछि दिल्लीमा बाढीको अवस्था छ । बिहीबार दिउँसो २ बजेसम्म यमुनाको जलस्तर २०८ दशमलव ६२ मिटर पुगेको थियो । यो खतराको चिन्ह २०५ मिटरभन्दा ३ मिटर बढी हो ।
यमुना वजिराबाददेखि ओखलासम्मको दुरी २२ किलोमिटर छ । बिहीबार दिउँसो पानीको सतह २०९ मिटर पुगेपछि अधिकांश क्षेत्र डुबानमा पर्न सक्ने केन्द्रीय जल आयोगले आशंका गरेको छ । एनडीआरएफको १२ टोली यहाँ तैनाथ गरिएको छ । २ हजार ७ सय राहत शिविर स्थापना गरिएको छ ।
धेरै क्षेत्र पानीमा डुबेका छन् । ५ देखि ६ फिटसम्म पानी भरिएको छ । यमुना नदी किनारका १६ हजारभन्दा बढी मानिसलाई विस्थापित गरी सुरक्षित स्थानमा लगिएको छ । दिल्ली सरकारले एक एडभाइजरीमा बाहिरी राज्यका मानिसहरूलाई दिल्ली प्रवेश नगर्न भनेको छ ।
सिंहु नाका, बदरपुर नाका, लोनी नाका र चिल्ला नाका सिल गरिएको छ । ठूला मालसामानका सवारी साधनलाई प्रवेशमा रोक लगाइएको छ । साना सवारी साधनको प्रवेश भने जारी रहनेछ । दिल्ली सरकारले आइतबारसम्म सबै विद्यालय र कलेज बन्द गर्ने आदेश दिएको छ ।
