हेटौँडा । बागमती प्रदेश सरकारले चालू आर्थिक वर्षमा विनियोजन गरेको बजेटको २३ अर्ब रकम फ्रिज भएको छ ।
चालू आर्थिक वर्षको लागि प्रदेश सरकारले ७० अर्ब ९३ करोड ९२ लाख ९१ हजार बजेट ल्याएकोमा त्यसको खर्च हुन नसक्दा २३ अर्ब २८ करोड ९४ लाख ४१ हजार ३ सय ८२ रुपैयाँ बजेट फ्रिज भएको हो ।
पुरा बजेटको ६७.१९ प्रतिशत रकम फ्रिज भएको प्रदेश लेखा नियन्त्रक कार्यालय हेटौँडाले जनाएको छ। कार्यालयको अनुसार प्रदेश सरकारले कुल बजेटको पुँजीगत र चालु खचै तर्फ ७० प्रतिशत पनि खर्च गर्न सकेन ।
१४ मन्त्रालय रहेको बागमती प्रदेशमा सबैभन्दा धेरै रकम खर्च गर्ने मन्त्रालयको रूपमा भूमि व्यवस्था सहकारी तथा गरिबी निवारण मन्त्रालय रहेको कार्यालयले जनाएको छ । मन्त्रालयले प्राप्त गरेको ११ करोड ७९ लाख ५३ हजार रुपैयाँ मध्ये १० करोड ६४ लाख ३० हजार खर्च गरेको छ ।
यस्तै, सबैभन्दा कम खर्च मुख्यमन्त्री कार्यालयले गरेको पाइएको छ । मुख्यमन्त्री कार्यालयले पाएको ६१ करोड ८२ लाख ९१ हजार रुपैयाँ बजेट मध्ये ३५ करोड ९ लाख ६० हजार रुपैयाँ मात्र खर्च गरेका ेछ । यसले कुल बजेटको ५६.७० प्रतिशत मात्र खर्च गर्न सक्यो ।
यस्तै, बागमतीका सबैभन्दा धेरै बजेट हिस्सा २१ अर्ब ९८ करोड ८९ लाख रुपैयाँ रहेको भौतिक पूर्वाधार विकास मन्त्रालयले कुल बजेटको १५ अर्ब ३७ करोड ५२ लाख ७२ हजार रुपैयाँ मात्र खर्च गरेको छ । पुरा बजेटको ६९.९२ प्रतिशत मात्र खर्च गरेको पाईएको छ ।
