काठमाडौं । नेपाली काँग्रेसका सहमहामन्त्री डा. प्रकाश शरण महतले नुवाकोटको खरानीटार अस्पतालका लागि आज छ थान बेड हस्तान्तरण गर्नुभएको छ ।नुवाकोटको तादी गाउँपालिकामा पर्ने सो अस्पतालका लागि सो गाउँपालिका तथा खरानीटार अस्पतालका अध्यक्ष नारायण पाण्डेमार्फत् ती बेडहरु आज हस्तान्तरण गर्नुभएको हो ।
सो अवसरमा सहमहामन्त्री डा.महतले देश महामारीको चपेटामा परेको समयमा सरकार सत्ता केन्द्रित बनेको नमिठो यथार्थ सबैले देखे भोगेकै विषय हो भन्दै सानो मात्रामा भए पनि यी सामग्रीले स्थानीय विरामीहरुका लागि सहयोग पुग्ने अपेक्षा गरेको बताउनुभयो ।
उहाँले महामारीले देश र जनता आक्रान्त बनेको यस अवस्थामा सरकारले जनताको जीवन बचाउनका लागि प्रभावकारी रुपमा काम गर्न नसकेको कुरा सबैमा जगजाहेर रहेको भन्दै यस्तो बेलामा नेपाली काँग्रेसले देशैभरि आफ्ना संयन्त्रहरु परिचालन गरी उपचारका लागि सहजीकरण गर्ने तथा जनताको अवस्थाका बारेमा घच्घचाउने काम गरिरहेको उल्लेख गर्नुभयो ।
काठमाडौंमा भएको त्यस हस्तान्तरण समारोहमा नेपाली काँग्रेसका महासमिति सदस्य बिना महत, नेपाली काँग्रेस नुवाकोटका नेता अर्जुन न्यौपानेलगायतको उपस्थिति थियो ।
