काठमाडौं । आर्थिक सर्वेक्षण शुक्रबार (भोली) २ बजे सार्वजनिक हुने भएको छ । अर्थ मन्त्रालयले सर्वेक्षण कार्यक्रम जुमबाट गर्ने भएको हो ।
उक्त कार्यक्रम मन्त्रालयबाट नै सार्वजनिक गर्ने अर्थ मन्त्रालयले जानकारी दिएको छ । अर्थमन्त्रालयको कार्यक्रममा फोटो तथा भिडियोको लागि सिमित पत्रकारलाई प्रवेश दिने भएको छ ।
यता जेठ १५ गतेको बजेट भने अर्थमन्त्री विष्णु प्रसाद पौडेलले सिंहरबारबाटै सार्वजनिक गर्ने छन् । बजेट शनिबार ४ बजे सार्वजनिक हुने कार्यक्रम तय भएको मन्त्रालयले जनाएको छ ।
प्रतिनिधिसभा विघटन भएकाले नयाँ संविधान आएपछि पहिलो पटक अर्थमन्त्री पौडेलले आगामी आर्थिक वर्षको बजेट अध्यादेशबाट ल्याउन लागेका हुन् । सरकारले १५ दिन अघि नीति तथा कार्यक्रम ल्याउनुपर्ने कानुनी व्यवस्था भए पनि तरल राजनीतिका कारण यो पटक नीति तथा कार्यक्रम आएन ।
काम चलाउ सरकारले काम चलाउ बजेट ल्याउनुपर्ने विज्ञहरुले भनिरहेका बेला ओली सरकारले चुनाव घोषणा गरेकाले मतदाता रिझाउने खालका कार्यक्रम ल्याउन लागेको बुझिएको छ । सबैलाई रिझाउन खोज्दा बजेटको आकार भने बढ्ने देखिन्छ ।
