काठमाडौँ । नयाँ सरकार गठनका लागि कोशी प्रदेश प्रमुख पर्शुराम खापुङले दिएको समय सीमा आज सकिँदैछ । मुख्यमन्त्री हिक्मत कार्कीले विश्वासको मत प्राप्त गर्न नसकेपछि नेकपा (एमाले) नेतृत्वको सरकार ढलेपछि प्रदेश प्रमुख खापुङले नयाँ सरकारका लागि दाबी पेश गर्न आह्वान गर्नुभएको थियो ।
प्रदेश प्रमुख खापुङले गत १७ गते संविधानको धारा १६७ को उपधारा ९२० अनुसार दुई वा दुईभन्दा बढी दल मिलेर सरकार गठनका लागि दाबी पेस गर्न आज साँझ ५ बजेसम्मको समय दिनुभएको छ ।
यद्यपि नयाँ सरकार बनाउनका लागि आवश्यक बहुमत दुबै गठबन्धनमा पुग्दैन । प्रदेश सरकार निर्माणका लागि ४७ मत आवश्यक पर्छ । हाल नेकपा (एमाले) र राप्रपा गठबन्धनसँग ४६ मत छ भने अर्को गठबन्धनसँग पनि ४६ मत नै छ । यद्यपि नेकपा माओवादी केन्द्रबाट निर्वाचित भइ सभामुख बन्नुभएका बाबुराम गौतमलाई पनि जोडेर बहुमत पुर्याउने तयारी गरिएको छ । तर नेकपा (एमाले)ले भने त्यसो गरिए आफू विरोधमा उत्रने चेतावनी दिइसकेको छ ।
गठबन्धन दलले यसअघि नै मुख्यमन्त्रीमा नेपाली कांग्रेस नेता उद्धव थापालाई अघि सारिसकेको छ । राप्रपालाई सहमतिमा ल्याउने जिम्मेवारी पनि उहाँलाई नै दिइएको छ । राप्रपासँग प्रदेशसभामा छ सिट छ । राप्रपाले भने सरकार गठनमा सहयोग गर्ने वा नगर्नेबारे कुनै निष्कर्ष निकाल्न सकेको छैन । राप्रपा यसअघि एमाले नेतृत्वको सरकारमा सहभागी थियो ।
कोशीमा गठबन्धन दल कांग्रेसको २९, माओवादीको सभामुखसहित १३, नेकपा एकीकृत समाजवादीको ४ र जसपाको १ गरी गठबन्धन दलसँग बहुमत दाबी गर्ने सिटसंख्या ४७ रहेको छ ।
यदि आज कुनै पनि दलले बहुमत पुर्याउन नसकेको अवस्थामा संविधानको धारा १६८ को उपधारा (३) अनुसार ठूलो दलको नेताका रुपमा हिक्मत कार्कीनै मुख्यमन्त्री बन्नुहुनेछ । तर उहाँले पनि ३० दिनभित्र विश्वासको मत लिनुपर्ने हुन्छ ।
