एजेन्सी । श्रीलंकाले तेस्रो तथा अन्तिम ओडिआई खेलमा बंगलादेशलाई २ सय ८७ रनको चुनौतीपूर्ण लक्ष्य दिएको छ ।
ओपनर तथा कप्तान कुशल पेरेरा शतकको सहयोगमा श्रीलंकाले सो लक्ष्य प्रस्तुत गरेको हो ।
ढाकामा टस जितेर पहिला ब्याटिङ थालेको श्रीलंकाले निर्धारित ५० ओभरमा ६ विकेट गुमाउँदै २ सय ८६ रन बनायो ।
श्रीलंका कप्तान कुशल पेरेराले १ सय २२ बलमा ११ चौका र १ छक्का सहित सर्वाधिक १ सय २० रनको शतकीय पारी खेले । कुशलको यो ओडिआई करिअरको छैटौं शतक रहेको छ । उनले ९९ बलमा शतक पूरा गरेका थिए ।
ओपनर कुशल र दनुष्का गुनाथिलका ११.२ ओभरमा ८२ रनको साझेदारी गर्दै श्रीलंकालाई राम्रो सुरुवात दिलाएका थिए ।
धनञ्जय ७० बलमा ४ चौका सहित ५५ रनमा अविजित रहे । डेब्यु खेल खेलेका रमेश मेन्डिस ६ बलमा १ छक्का सहित ८ रनमा अविजित रहे ।
बंगलादेशका तीव्र गतिका बलर तस्किन अहमदले ९ ओभरमा ४६ रन खर्चेर ४ विकेट लिए । शरिफुल इस्लामले १ विकेट लिए ।
