काठमाडौँ । नेपालस्थित पाकिस्तानी दूतावासले पाकिस्तानी सशस्त्र बलका विभिन्न संस्थाहरूमा तालिम लिएका नेपाली सेनाका अधिकारीहरूका लागि आइतबार पूर्वविद्यार्थी भेला आयोजना गरेको थियो।
कार्यक्रममा नेपाली सेनाका प्रधानसेनापति प्रभुराम शर्माका साथै नेपाली सेनाका सेवारत तथा सेवानिवृत्त अधिकृतहरुको उल्लेख्य उपस्थिति रहेको थियो ।
सो अवसरमा पाकिस्तानका रक्षा सहचारी कर्नेल मुहम्मद अली अल्वीले नेपाल र पाकिस्तानका दुई सशस्त्र सेनाबीच विशेष गरी तालिम क्षेत्रमा रहेको जीवन्त द्विपक्षीय सम्बन्धलाई प्रकाश पार्नुभयो । उहाँले नेपाली सेनाको क्षमता अभिवृद्धिमा पाकिस्तानी सशस्त्र बलको प्रतिबद्धतालाई जोड दिनुभयो ।
प्रधानसेनापति शर्माले नेपाली सेनाका अधिकृत, सैनिक तालिम र प्राविधिक क्षेत्रमा क्षमता अभिवृद्धिमा पाकिस्तानले गरेको योगदानको प्रशंसा गर्नुभयो । उहाँले नेपालले आफ्नो परराष्ट्र नीतिमा ‘पञ्चशील’ सिद्धान्तको पालना गरेको र ‘सबैका लागि मित्रता र कसैका लागि पनि शत्रुता नरहने’मा विश्वास गरेको बताउनुभयो । प्रधानसेनापति शर्माले पाकिस्तानका उत्कृष्ट तालिम संस्थाहरूमा तालिम प्राप्त अधिकारीहरूले गरेको योगदानको पनि प्रशंसा गर्नुभयो ।
पाकिस्तानी दूतावासका अनुसार कार्यक्रममा नेपालका लागि पाकिस्तानका राजदूत अबरार हाश्मीले नेपाल र पाकिस्तानबीच जनता, सरकार र सशस्त्र बलहरुबीच विश्वास तथा पारस्परिक लाभकारी सहकार्यमा आधारित बलियो सम्बन्ध रहेकोमा जोड दिनुभयो ।
सो अवसरमा पूर्वविद्यार्थी भेलाका सहभागीहरूले पाकिस्तानप्रति कृतज्ञता व्यक्त गर्दै कार्यक्रम आयोजना गर्नका लागि यो मिसनले आफूहरुलाई पाकिस्तानमा बसेको मनमोहक सम्झनाहरू पुनः ताजा गर्न प्लेटफर्म प्रदान गरेको बताएका थिए ।
